G’alaba muborak, Ilk chempionlik muborak, "Nasaf"!
2024-11-01 15:05:00 / Yangiliklar
Bugun futbol bo'yicha O'zbekiston Superligasi joriy mavsumi chempionligini muddatidan oldin qo’lga kiritgan vohamiz bosh jamoasini o‘zim, keng jamoatchilik va millionlab muxlislar nomidan tabriklayman!
Prezidentimizning barcha sohalar kabi sportga qaratayotgan e’tiborlari sabab yoshlarimiz ushbu yo‘nalishida ham yuqori natijalarni zabt etmoqda.
Qadrli “Nasaf”chilar!
Taʼkidlash zarurki, “Nasaf” butun Qashqadaryoning kayfiyatini belgilaydigan, gʻalabalari bilan mehnatkash xalqimizning ish samaradorligini oshiradigan, ijodkorlarimizga ilhom beradigan jamoaga aylanib boʻldi.
Bugun Sizlar vohamiz ahlining koʻp yillik orzusini sharaf va matonat bilan amalga oshirdingiz!
Xalq jamoasiga aylangan klubning har bir a’zosi va muxlislari g’alabaga loyiq edi. Bu mashaqqatli mehnatingiz mevasi ekanini barchamiz yaxshi bilamiz va yuksak qadrlaymiz.
Yodingizda boʻlsin, ortingizda nafaqat muxlislaringiz, balki Sizni faxr bilan qoʻllab-quvvatlayotgan butun Qashqadaryo viloyati xalqi turibdi!
Omad doimo Siz tomonda boʻlsin, mahoratingiz bilan dunyoni hayratda qoldirishingizga tilakdoshmiz!
Har biringizni ulkan zafaringiz bilan yana bir bor qutlayman.
Sohibqiron kamolga yetgan ulug‘ zamin farzandlariga faqat va faqat g‘alabalar yarashadi.
Sizlar hali ko‘p ulug‘ ishlarga qodirsiz!
Yangi yutuqlar sari olgʻa, azamatlar!
Murotjon Azimov, Qashqadaryo viloyati hokimi.
------------------------------
Ma’lumot o‘rnida, bugun jamoamiz "Lokomotiv" jamoasi mehmoni bo'lib, 0:1 hisobida g‘alaba qozondi.