Qashqadaryo viloyati hоkimligi

Bugun Qashqadaryo viloyati hokimi Murotjon Azimov Germaniyaning “Prosika” va “Motiba” kompaniyalari vakillarini qabul qilib, mehnat migratsiyasi, ta’lim, tibbiyot hamda investitsiya sohalarida hamkorlikni kengaytirish masalalarini muhokama qildi.

Uchrashuvda Germaniya bilan tartibli mehnat migratsiyasi yo‘nalishida amalga oshirilayotgan loyiha respublikada ilk bor Qashqadaryo viloyatida yo‘lga qo‘yilayotgani, bu borada hududda keng ko‘lamli tashkiliy ishlar amalga oshirilgani qayd etildi.

Viloyat rahbari nemis tili o‘qituvchilarini tayyorlash, yoshlarni kasb va tilga o‘qitish, Germaniyada ish bilan ta’minlash masalalarida Germaniya tomoni bilan o‘zaro manfaatli hamkorlikni yo‘lga qo‘yish muhimligini ta’kidladi. Shuningdek, loyihani uzoq muddatli va barqaror amalga oshirish maqsadida maxsus jamg‘arma va xususiy bandlik agentligini tashkil etish rejalari ma’lum qilindi.

Uchrashuv yakunida tomonlar kelgusida ta’lim, migratsiya, investitsiya, tibbiyot va sun’iy intellekt sohalarida hamkorlikni yanada kengaytirishga tayyor ekanliklarini bildirib, loyiha doirasida amaliy ishlarni jadallashtirish bo‘yicha kelishib oldilar.