Qashqadaryo viloyati hоkimligi

Viloyat hokimi Murotjon Azimov Ko‘kdala tumanidagi dekorativ qurilish materiallari ishlab chiqaradigan, dual ta’limga mo‘ljallangan “Promax plast premium” korxonasining ochilish marosimida ishtirok etdi va ishlab chiqarish faoliyatini ko‘zdan kechirdi.

Mazkur qurilish materiallarini ishlab chiqarish korxonasiga jami 20 mln. dollar investitsiya mablag‘i kiritilgach 250 ta doimiy ish o‘rni yaratiladi. Bu yerda plastik chiqindilarni qayta ishlash yo‘lga qo‘yilgan bo‘lib, plastmassa quvurlar, polietilen plyonkalar va bir necha turdagi dekorativ plastik mahsulotlar hamda metall profillar ishlab chiqariladi hamda tayyorlanadi.

Ushbu korxonada Xalqaro innovatsion universitetda yo‘lga qo‘yilgan “Dual ta’lim” bo‘yicha talabalar to‘liq bilim va mahoratlarini oshirib borishadi. Ya’ni, nazariy bilimlarni amaliyot bilan uyg‘unlashtirgan holda ishlab chiqarish jarayonida bevosita ishtirok etishadi. Bu esa hududimizda malakali kadrlar tayyorlashda muhim qadam bo‘lib xizmat qiladi.

Ochilish tadbiridan so‘ng viloyat hokimi Murotjon Azimov yangi ish boshlagan korxonada “Yashil makon” umummilliy loyihasi doirasida ko‘chat ekish tadbirlarida ishtirok etdi.