Buxoro viloyati Peshku tumani hokimligi

Tadbirlar davomida yangragan jozibali kuy-qo‘shiqlar, san’atkorlarning yurakdan ijro etilgan chiqishlari Navro‘zning betakror ruhini yanada yuksaltirdi. Yoshlar tomonidan namoyish etilgan milliy va zamonaviy raqslar esa avlodlar davomiyligi, an’ana va zamonaviylik uyg‘unligini aks ettirib, tomoshabinlarga alohida zavq bag‘ishladi. Sport musobaqalari, xalq o‘yinlari va bellashuvlar esa bayramga jo‘shqinlik baxsh etib, sog‘lom turmush tarzining naqadar muhim ekanini yana bir bor namoyon qildi.

Ayniqsa, Navro‘zga xos milliy udumlar — sumalak sayillari, milliy taomlar ko‘rgazmalari, xalq amaliy san’ati namunalari, qadimiy urf-odatlar asosida sahnalashtirilgan chiqishlar barchada chuqur taassurot qoldirdi. Bu jarayonlar orqali ajdodlarimizdan meros bo‘lib kelayotgan boy ma’naviy qadriyatlar, milliy o‘zlik va birlik tuyg‘usi yanada mustahkamlandi.

Bayramga tashrif buyurgan fuqarolar samimiy, iliq va do‘stona muhitdan bahramand bo‘lib, o‘zaro mehr-oqibat, hurmat va ehtiromni his etdilar. Keksalar duoga qo‘l ochib, yoshlarga ezgu tilaklar bildirdi, yoshlar esa katta avloddan saboq olib, milliy qadriyatlarga sadoqat ruhida birlashdilar. Keksayu yosh birdek Navro‘z shodiyonasidan bahra olib, yurtimizda hukm surayotgan tinchlik va osoyishtalik, farovon hayotdan mamnun ekanliklarini chuqur his etdilar.

Navro‘z — bu shunchaki bayram emas, balki inson qalbini poklaydigan, mehr-muhabbatni kuchaytiradigan, tabiat va jamiyat uyg‘unligini tarannum etadigan ulug‘ ayyomdir. U har bir yurtdoshimizni ezgulikka, bag‘rikenglikka, o‘zaro hurmat va birdamlikka chorlaydi. Shu bois ham Navro‘z sayillari tumanda nafaqat tantana, balki ma’naviy yangilanish, qalblar uyg‘onishi va kelajakka bo‘lgan ishonch bayramiga aylandi.