Peshku: Toshevalar oilasi 7 sotixli issiqxona xoʻjaligida moʻl hosil yetishtirmoqda
2026-03-12 12:05:00 / Yangiliklar
Mazkur qaror asosida yoshlarning bandligini taʼminlash, kasb-hunarga oʻqitish, tashabbuslarini qoʻllab-quvvatlash boʻyicha mexanizmlar yoʻlga qoʻyildi. Aniqrogʻi, joylarda yosh tadbirkorlarni moliyaviy qoʻllab-quvvatlash, biznes loyihalarini amalga oshirish uchun “Aloqabank” yoshlar banki sifatida biriktirilgan.
Ayni kunda Peshku tumani “Guliston” mahalla fuqarolar yigʻinidagi aholi tomorqalarida ham issiqxona xoʻjaliklari koʻpaymoqda. Hududda ayni kunda 3,5 mingdan ortiq aholi istiqomat qilayotgan boʻlsa, ularning aksariyatida tomorqadan unumli foydalanish, mavsumda moʻl hosil yetishtirish, qolaversa, chorva mollarini boqib, daromad topish tajribasi shakllangan.
Davlatimiz rahbarining yuqoridagi qaroridan unumli foydalanayotgan yoshlardan biri “Guliston” MFY ning Joʻgarebolo qishlogʻida yashovchi Dildora Toshevadir. Uning tadbirkorlik tashabbusiga kelsak, bu loyihaning umumiy qiymati 200 million soʻmni tashkil etadi. Shundan 100 million soʻm bank imtiyozli kredit mablagʻi, qolgan qismi esa tadbirkorning oʻz oilaviy daromadi hisobidan moliyalashtirilgan. Faoliyatni amalga oshirish uchun Dildora Tosheva oilasi tomorqasining 7 sotix yer maydonida issiqxona xoʻjaligi tashkil etib, dehqonchilik faoliyatini yoʻlga qoʻygan.
Ayni qishki mavsumda bu issiqxonada bodring yetishtirilgan boʻlib, shu kunlarda hosilni yigʻib-terib olib saranjomlash ishlari bormoqda. Oila aʼzolarining qish oylarida issiqxonadagi hosil sotuvidan qoʻlga kiritgan daromadi 50 million soʻmdan oshgan. Hozirda issiqxonani sovuq mavsumda isitish uchun zamonaviy rusumli qozonxona, shunga yarasha qattiq yoqilgʻi, tomchilatib sugʻorish tizimi joriy qilinmoqda.
Hozirda issiqxonada mavsumiy sabzavot mahsulotlari yetishtirish uchun ishchi kuchi sifatida qishloqdosh qoʻni-qoʻshnilardan 3 nafari jalb qilingan va ularga mehnatiga yarasha, 3 million soʻm atrofida maosh tayinlangan. Faoliyatdan olinayotgan moddiy tushum orqali soliq toʻlovlari amalga oshirilib, mahalliy iqtisodiyotga qoʻshimcha qiymat yaratilmoqda.
Peshku tuman hokimligi matbuot xizmati