Peshku tuman prokurori, adliya maslahatchisi Anvar Shuxratovich Esanovning tuman aholisiga Murojaatnomasi
2026-03-10 15:15:00 / Rahbariyatning bayonotlari va nutqlari
Bu davrda sodir etilgan jinoyatlarning 6 tasi yoki 30 foizi
oldi olinishi mumkin bo‘lgan va 9 tasi yoki 70 foizi aniqlanadigan jinoyatlarni tashkil etgan.
Tuman hududida huquqni muhofaza qiluvchi organlari tomonidan olib borilgan profilaktik tadbirlar natijasida, og‘ir, o‘rtacha
og‘ir va yengil tan-jarohati yetkazish, bezorilik, oilaviy zo‘ravonlik, bosqinchilik, tanlonchilik va nomusga tegish, transport vositasini olib qochish kabi jinoyatlari sodir etilmadi.
Fosh etilmagan jinoyatlarni fosh etish va qidiruvdagilarni topish hamda jinoyatchilikning barvaqt oldini olish, hududda kriminogen vaziyatni barqarorlashtirish, mahallalarda xavfsiz muhitni ta’minlash borasida Peshku tumanida “Xavfsiz hudud” tadbirlari doirasida tezkor profilaktik tadbirlarni tashkil etish va amalga oshirish borasida alohida ishchi guruhlar shakllantirilib, hududlardagi kriminogen vaziyat, sodir etilayotgan jinoyatlarning
o‘ziga xos-xususiyatlaridan kelib chiqib, amalga oshirilishi lozim
bo‘lgan chora-tadbirlar “Yo‘l xaritasi” ishlab chiqilgan.
Bugungi kunda har bir mahalla fuqarolar yig‘inlarida huquqbuzarlik va jinoyatchilikni barvaqt oldini olish choralarini ko‘rib borishlik hamda biriktirilgan xodimlarning shaxsiy mas’uliyatini oshirish bo‘yicha tegishli topshiriqlar berilgan.
Shuningdek, O‘zbekiston Respublikasi Prezidentining 05.01.2026 yildagi “Respublika mahallalarida xavfsiz muhitni yaratish yo‘nalishida yaxlit manzilli ishlash tizimini joriy etishga qaratilgan qo‘shimcha chora-tadbirlar to‘g‘risida”gi 1-sonli hamda
“2026 yilda Respublika mahallalarida jinoyatchilikning barvaqt profilaktikasi samaradorligini yanada oshirish bo‘yicha tashkiliy
chora tadbirlar to‘g‘risida”gi 2-sonli Qarorlari ijrosi yuzasidan tumandagi barcha mahallalarni kriminogen vaziyatdan kelib chiqib, qizil, sariq va yashil hududlarga ajratilib, tegishli tartibda
yo‘l xaritalari ishlab chiqilgan holda bir qator ishlar
amalga oshirib kelinmoqda.
Xususan, bugungi kunga qadar mahalladagi aholi gavjum joylar
va ko‘chalariga 20 dona, ko‘p qavatli uylarning hovlilariga 4 dona, mahallalarning asosiy kirish-chiqish joylariga 22 dona, tumanlardagi savdo markazlari va bozorlarga 20 dona, maktablarning kirish-chiqish joyiga 9 dona hamda maktabning ochiq sport maydonlariga 4 dona
PTZ kameralari, shuningdek, ko‘p qavatli uylarning eshiklariga
7 dona domofonlar o‘rnatilishi ta’minlandi.
Ko‘p qavatli va yakka tartibdagi xonadonlarni 91 tasi Milliy gvardiya qo‘riqlash xizmati tomonidan texnik qo‘riqloviga olindi.
Ko‘p qavatli uylarning kirish yo‘laklari oldiga 3 ta tashvish tugmalari o‘rnatildi, mahallalardagi savdo va maishiy xizmat ko‘rsatish ob’yektlaridan 32 tasi Qo‘riqlash xizmati tomonidan texnik qo‘riqlovga olindi, 8 ta “Namunaviy xavfsiz ko‘cha” va 3 ta “Namunaviy xavfsiz o‘y”lar tashkil etildi.
Ichki ishlar organlari xodimlari va boshqa huquqni muhofaza qiluvchi idoralar hamda keng jamoatchilik bilan hamkorlikda tumanimiz hududida giyohvand hamda psixotrop moddalarning noqonuniy aylanishiga qarshi keskin kurash olib bormoqdamiz.
Bu illatga qarshi kurashishda, eng avvalo, yoshlar hamda voyaga yetmaganlar orasida keng tarqalishini oldini olishda manzilli,
tezkor hamda profilaktik tadbirlar o‘tkazilmoqda.
Bugungi kunda bu turdagi jinoyatlar ham zamonaviylashgan, giyohvand hamda psixotrop moddalar savdosi bilan shug‘ullanish ijtimoiy tarmoqlarga ko‘chgan.
Internet do‘konlari, ularning administrator va operatorlari, “kladmenlar” va “zakladchiklar” orqali jinoyatlar sodir etilmoqda.
Bu jarayonga bizning sodda yoshlarimiz, ayniqsa, voyaga yetmaganlarning jalb etilayotgani esa o‘ta xatarlidir.
Bu jinoiy guruhlar faoliyati xorijdan turib boshqarilmoqda. Ularga yetib borish turli qiyinchiliklarni tug‘dirmoqda. Ammo fuqarolarimizdagi loqaydlik va atrofdagi hodisalarga bee’tiborlik ham aynan ushbu turdagi jinoyatlarning keng quloch yoyishiga sabab bo‘lmoqda.
Shuning uchun hurmatli ota-onalar, aziz vatandoshlar, e’tiborli bo‘lib, bu illatga qarshi barchamiz birgalikda kurashishimiz shart!
Farzandlaringiz, aka-uka, yaqinlaringiz, tanish-bilishlaringiz orasida xulq-atvori, yurish-turishi, xatti-harakatlarida kutilmagan o‘zgarish bo‘lsa, buni yashirishga urinmang.
“Mahalla-ko‘y, tanish-bilishlar nima deydi” degan o‘y-hayol bilan yashirishga urinmang.
Bir o‘zingiz ularni og‘u-domidan chiqarib ololmaysiz.
Bunday shaxslarga mutaxassislarning yordami kerak va o‘z vaqtida yaqinlaringizni giyohvandlik domidan tortib olsangiz, yanada og‘irroq oqibatlarni oldini olgan bo‘lasiz.
Biz bu jinoyatlarni sodir etayotganlarni aniqlab, aybdorlarga nisbatan jazo muqarrarligini ta’minlaymiz, albatta, lekin shaxs javobgarlikka tortilishi bilan uning kelajagi, oilasi nima bo‘ladi?
Bu illat butun jamiyatimiz va kelajagimizga katta xavf tug‘dirishini unutmaylik.
Giyohvand moddalar yoki kuchli ta’sir qiluvchi dorilar iste’moli ta’siri ostida har qanday jinoyatlar, ayniqsa eng og‘ir turdagi jinoyatlar sodir etilishi muqarrar va biz bu holatlarni
o‘z tajribamiz davomida ko‘rib turibmiz.
Bunday vositalar ta’siri ostida transport vositalarini boshqargan shaxslar esa og‘ir oqibatli yo‘l-transport hodisalarini sodir etishlari mumkinligini ham unutmaslik kerak. Chunki, bunday shaxslar nafaqat o‘z hayotiga, balki boshqa begunoh insonlarning
ham hayotiga zomin bo‘lishiga yanada achinarli holdir.
Shu bilan birga, men yana bir masalaga e’tibor qaratishlaringizni so‘rayman!
Kiberjinoyatlar, ya’ni axborot texnologiyalari yordamida sodir etiladigan jinoiy tajovuzlar, bu turdagi jinoyatlar zamon va makon tanlamasligi va masofadan turib sodir etilayotganligi sababli,
ish faoliyatimizda anchayin qiyinchiliklarni tug‘dirmoqda.
Bu turdagi jinoyatlarga qarshi kurashishning eng samarali
usuli fuqarolarda kiberjinoyatlarga qarshi immunitetni shakllantirishdir.
O‘zimizni bu jinoyatlardan himoya qilishni o‘rganishimiz kerak.
Bizni ishonuvchanligimiz, oson boylik orttirishga bo‘lgan qiziqishimiz bu qopqonga tushishimizga sabab bo‘lmoqda.
Shu sababli, aholimizdan quyidagilarga alohida e’tibor qaratishlarini so‘rayman:
- eng avvalo, telefon va gadjetlaringizga ikki bosqichli parol o‘rnating, avtomatik yuklab olish ilovalarini o‘chirib qo‘ying;
- plastik karta pin-kodini begona shaxslarga bermang;
- savdo nuqtalari atrofidagi begona shaxslar orasida karta
pin-kodini ma’lum qilmang, terminalga pin-kodni shaxsan kiriting, pin-kodni kiritish qurilmalarida shubhali qoplamalar mavjud emasligini tekshiring;
- masofadan turib elektron to‘lovlarni yoki pul o‘tkazmalarini amalga oshirish davomida maxsus kodni oshkor etmang;
- elektron pochta yoki ijtimoiy tarmoqlardan bank plastik karta to‘g‘risidagi maxfiy ma’lumotlarni jo‘natmang;
- bank plastik kartasi uchun SMS-xabarnoma xizmatini begona shaxslar telefon raqamiga ulamang;
- yaqinlaringiz va tanishlaringizning garovga olinganligi, yordamga muhtojligi yoki biror bir mushkul ahvolga tushib qolganligini aytib, tanish do‘sti, tergovchi, tibbiyot xodimi yoki boshqa shaxs maqomida qo‘ng‘iroq qilib pul talab qilishayotgan bo‘lishsa yoxud chet mamlakatda yurgan yaqiningiz ovozida qo‘ng‘iroq qilib pul so‘rashsa aslo ishonmang. Chunki, bu sun’iy intellekt orqali amalga oshirilayotgan firibgarlik bo‘lishi mumkin.
Agarda yuqoridagi kabi holatlarga duch kelsangiz darhol
“102” qisqa raqamiga murojaat qilishni unutmang.
Hurmatli vatandoshlar!
Mahallangiz, oilangiz, yaqinlaringiz, qo‘ni-qo‘shnilar, tanish- bilishlar orasida huquqbuzarliklarning barvaqt oldini olishda sizlardan jonbozlik ko‘rsatishingizni so‘rab qolamiz.
Agarda, Sizlarda fuqarolar, jamiyat va davlat xavfsizligiga turli xatarlar bo‘yicha, shuningdek, boshqa shaxslar tomonidan sodir etilayotgan huquqbuzarliklar va jinoyatlar haqida ma’lumotlar
bo‘lsa, bu haqda “102” qisqa raqami orqali yoki eng yaqin ichki ishlar organlariga xabar berishingizni so‘raymiz.
Albatta, xabar berganlarning shaxsiga doir ma’lumotlar
sir saqlanishiga kafolat beramiz.
Shuni e’tiborga olingki, bu davlat va jamiyat oldidagi
o‘z burchiga sodiqlik hisoblanadi.
Sizning shu xabaringiz orqali og‘ir oqibatli jinoyatlarning oldi olinishi, insonlarning hayoti saqlab qolinishi mumkinligini aslo unutmang. Hech birimiz befarqlikka berilmasligimiz lozim.
Agar Sizning ma’lumotingiz asosida og‘ir yoki o‘ta og‘ir jinoyatlar to‘xtatib qolinsa, shaxs, jamiyat va davlat manfaatlariga jiddiy ziyon yetkazilishining oldi olinsa, o‘rnatilgan tartibda rag‘batlantirish choralarini ham ko‘ramiz.
Shuni bilingki, jinoyat sodir etilganidan keyin emas, ularni oldindan bartaraf etishga e’tibor qaratishimiz lozim.
Murojaatim so‘ngida yana bir muhim masalani e’tiboringizga havola qilmoqchiman.
Hammamizga ma’lumki, muhtaram Prezidentimiz huzurida o‘tkazilgan Korrupsiyaga qarshi kurashish bo‘yicha milliy Kengash yig‘ilishida, Buxoro viloyatini korrupsiya va jinoyatchilikdan
holi hududga aylantirish borasida, “Buxoro tajribasi”ni yaratish, keyinchalik esa ushbu ijobiy tajribani respublikaning boshqa hududlariga tadbiq etish nazarda tutilgan.
Bunday mas’uliyat buxoroliklarga berilgan ishonchning yuksak namunasidir.
Bugungi kunda aynan ushbu topshiriqdan kelib chiqib, viloyat hokimi boshchiligida barcha davlat va nodavlat tashkilotlar
mas’ul rahbarlari bilan birgalikda keng ko‘lamli va manzilli
chora-tadbirlar amalga oshirilmoqda.
Hurmatli tumanimiz fuqarolari, keling hammamiz birgalashib, korrupsiogen holatlarga murosasiz bo‘lgan holda mahallalarimiz
va xonadonlarimizni jinoyatdan xoli hududga aylantiraylik.
Shu fursatdan foydalanib, barchangizga kirib kelayotgan “Navro‘z” bayrami bilan tabirklayman, Sizlarga mustahkam sog‘lik, xonadoningizga xotirjamlik, fayzu-baraka tilayman!
Yurtimiz tinch, osmonimiz musaffo bo‘lsin!
E’tiboringiz uchun rahmat!