Peshku tumani Navgahon mahalla fuqarolar yig‘ini hududida faoliyat yurituvchi yakka tartibdagi tadbirkor Kamolov Ruslan Rahmatillo o‘g‘lining ishlab chiqarish loyihasi
2026-02-07 16:35:00 / Yangiliklar
Loyihaning umumiy qiymati 1,5 mlrd so‘mni tashkil etib, shundan 415 mln so‘mi imtiyozli bank krediti hisobidan ajratildi. Mazkur mablag‘lar zamonaviy un tortish uskunalarini xarid qilish, ishlab chiqarish maydonini tayyorlash hamda texnologik jarayonlarni yo‘lga qo‘yishga yo‘naltirildi.
Loyihaning maqsadi – hududda oziq-ovqat xavfsizligini ta’minlash, mahalliy xomashyoni chuqur qayta ishlash orqali import o‘rnini bosuvchi mahsulotlar ishlab chiqarish, aholini sifatli un mahsulotlari bilan uzluksiz ta’minlash hamda narx barqarorligiga hissa qo‘shishdan iborat. Shuningdek, qishloq xo‘jaligi mahsulotlariga qo‘shimcha qiymat yaratish va fermer xo‘jaliklari bilan kooperatsiyani rivojlantirish ko‘zda tutilgan.
Tashkil etilgan korxonada asosan oliy va birinchi navli un, kepak, chorva uchun omuxta yem kabi mahsulotlar bozorga chiqariladi. Mazkur mahsulotlar tuman va qo‘shni hududlardagi aholi, non ishlab chiqaruvchi tadbirkorlar hamda chorvachilik xo‘jaliklariga yetkazib berilishi rejalashtirilgan.
Ishlab chiqarish quvvati oyiga 150 tonnani tashkil etib, o‘rtacha yillik aylanma daromad 2,8–3,2 mlrd so‘m atrofida bo‘lishi prognoz qilinmoqda. Loyiha to‘liq quvvatga chiqqanidan so‘ng byudjetga yillik soliq tushumlari 180–220 mln so‘m miqdorida shakllanishi kutilmoqda.
Loyihaning ijtimoiy ahamiyati yuqori bo‘lib, uni amalga oshirish natijasida 5 ta doimiy yangi ish o‘rni yaratildi, yoshlarning tadbirkorlik faoliyatiga keng jalb etilishiga zamin yaratildi. Bundan tashqari, hududda qishloq xo‘jaligi mahsulotlarini qayta ishlash hajmi ortib, aholi daromadlarini oshirish va iqtisodiy faollikni kuchaytirishga ijobiy ta’sir ko‘rsatmoqda.