O‘zbekiston Respublikasi Madaniyat vazirligi

1-oktyabr "O‘qituvchi va murabbiylar kuni" arafasida O‘zbekiston davlat konservatoriyasi Nukus filialining yangi o‘quv binosi foydalanishga topshirilib, tantanali ochilish marosimi bo‘lib o‘tdi.

Ochilish marosimida Qoraqalpog‘iston Respublikasi Jo‘qorg‘i Kengesi raisi Amanbay Orinbayev, O‘zbekiston Respublikasi Madaniyat vazirining birinchi o‘rinbosari Avazxon Tadjixanov, Qoraqalpog‘iston Respublikasi Madaniyat vaziri Begis Temirbayev hamda professor, o‘qituvchilar, talabalar ishtirok etishdi.

So‘zga chiqqanlar mamlakatimizda davlatimiz rahbarining tashabbusi bilan oliy ta’lim sifatini oshirish, ularning moddiy-texnik bazasini mustahkamlash, o‘qituvchilarning mehnat va yashash sharoitini yaxshilash, talabalarni har tomonlama qo‘llab-quvvatlash borasida amalga oshirilayotgan keng ko‘lamli islohotlarga to‘xtalishdi.

Foydalanishga topshirilgan filialning 300 o‘rinli o‘quv binosi 27 milliard so‘m mablag‘ hisobiga yangidan qurib bitkazildi. Unda yoshlarning chuqur bilim olishlari uchun barcha qulay sharoitlar yaratilgan.

Tadbir yakunida ishtirokchilar yangi o‘quv binosidagi sharoitlar bilan ham yaqindan tanishishdi.

Ma’lumot uchun: Muhtaram Prezidentimiz tashabbusi bilan tashkil etilgan O‘zbekiston davlat konservatoriyasi Nukus filiali o‘z faoliyatini boshlaganiga ham 4 yildan oshdi. Shu qisqa vaqt ichida filialda davlat stipendiyasi sohiblari, "Mard o‘g‘lon" davlat mukofoti, "Umid uchquni" ko‘krak nishoni egalari, shuningdek, xalqaro va respublika tanlovlari g‘oliblari yetishib chiqdi.

Filial tashkil etilgan yili o‘qishga 47 nafar talaba qabul qilingan bo‘lsa, bugungi kunda ularning soni 241 nafarni tashkil etdi. 2025-yilda birinchi bitiruvchilar o‘qishni muvaffaqiyatli tamomlab, 10 nafar talaba magistraturaga qabul qilindi, qolgan talabalar esa 100 foiz ish bilan ta’minlandi. Joriy yilda 5 ta yo‘nalish bo‘yicha jami 61 nafar talaba o‘qishga qabul qilindi.  

Tadbirdan so‘ng, Avazxon Tadjixanov Qoraqalpog‘iston Respublikasi madaniyat vaziri Begis Temirbayev bilan birgalikda 1-oktyabr - "O‘qituvchi va murabbiylar kuni" munosabati bilan madaniyat va san’at sohasida yoshlarga ta’lim-tarbiya berayotgan bir guruh ustozlarga O‘zbekiston Respublikasi Madaniyat vazirligining “Madaniyat va san’at fidokori” ko‘krak nishonini topshirdi.

Shuningdek, Nukus shahridagi Opera san’atiga ixtisoslashtirilgan maktab-internati faoliyati bilan yaqindan tanishib, Qoraqalpoq davlat Qo‘g‘irchoq teatrida namoyish etilgan “Sohibjamol va maxluq” spektaklini tomosha qildi.