25–30-aprel kunlari Xorazmning Xiva shahrida “Lazgi” II xalqaro raqs festivali bo‘lib o‘tadi
2024-03-29 10:50:00 / Yangiliklar
O'zbekistonning boy raqs san’ati tarixida alohida o‘rin egallagan “Xorazm lazgi raqsi” o‘ziga xos ijro uslubi va jozibasi bilan nafaqat O‘zbekistonda, balki chet davlatlarda ham mashhur.
“Xorazm lazgi raqsi” YUNESKO tomonidan insoniyatning nomoddiy madaniy merosi ro‘yxatiga kiritilgan.
Festival doirasida raqs san’atiga bag‘ishlangan ko‘rgazma pavilonlari, milliy cholg‘u asboblari va liboslari, hunarmandchilik buyumlari, tasviriy va amaliy san’at asarlari, haykaltaroshlik namunalari, badiiy va hujjatli filmlar, audio va video disklar, kitoblar, albomlar, fotosuratlar namoyishlari tashkil etiladi.
Ushbu tadbirda “Xorazm lazgi raqsi” san’atining asriy an’analarini saqlash va rivojlantirish, raqs san’ati orqali xalqlar o‘rtasidagi do‘stlik, birodarlik rishtalarini mustahkamlash, xalqaro miqyosda ijodiy hamkorlik ko‘lamini va madaniy aloqalarni yanada kengaytirish maqsad qilingan. Festival doirasida xalqaro ilmiy-amaliy konferensiya ham tashkil etilmoqda.
Eslatib o'tamiz, “Lazgi” II xalqaro raqs festivali “Eng yaxshi yakkaxon raqs ijrochisi“, “Eng yaxshi raqs jamoasi“, “Eng yaxshi sahnalashtirilgan raqs” 3 ta yo‘nalish bo'yicha ishtirokchilar musobaqalashishadi.