O‘zbekiston Respublikasi Vazirlar Mahkamasining tegishli farmoyishi asosida O‘zbekiston Respublikasi xalq artisti va san’at arbobi Bahodir Yo‘ldoshev tavalludining 80 yilligini nishonlash vazifasi belgilangan.

Shu munosabat bilan, kuni kecha vazirning birinchi o‘rinbosari Bahodir Ahmedov boshchiligida Tashkiliy ijodiy guruh yig‘ilishi bo‘lib o‘tdi.

Yig‘ilishda vazirlik markaziy apparati vakillari, vazirlik huzuridagi Kinematografiya agentligi direktori Shuhrat Rizayev, O‘zbekiston davlat filarmoniyasi direktori Anvar Tojiboyev, O‘zbekiston davlat drama teatri bosh rejissyori, O‘zbekiston san’at arbobi Olim Salimov va teatr direktorlari ishtirok etdi.

Yig‘ilish davomida Bahodir Yo‘ldoshev hayoti va ijodiga bag‘ishlagan adabiy-ma’rifiy xotira kechani o‘tkazish  hamda ustoz rejissyor haqida hujjatli film suratga olish yuzasidan tegishli topshiriqlar berildi.

Ma’lumot uchun, Bahodir Yo‘ldoshev ish faoliyatini O‘zbek milliy akademik drama teatrida boshlagan. U yerda bir necha o‘nlab g‘oyaviy-badiiy jihatdan yetuk spektakllar sahnalashtirib, teatr san’ati zarvaraqlarida chuqur iz qoldirgan. Bahodir Yo‘ldoshev tomonidan sahnalashtirilgan har bir spektakl mutaxassislar va tomoshabinlar tomonidan katta hayajon bilan kutib olingan va muvaffaqiyat qozongan. Shuningdek, Bahodir Yo‘ldoshev “Diydor rejissyorlik va aktyorlik mahorati teatr-studiyasi” davlat muassasasi asoschisi hisoblanib, umrining oxiriga qadar unga rahbarlik qildi.