O‘zbekiston Respublikasi Madaniyat vazirligi

Musiqa madaniyati ma’naviyatimizning muhim tarkibiy qismlaridan biri. Bugungi kunda ota-bobolarimizdan, ajdodlarimizdan qolgan ma’naviy boyliklarni, jumladan, musiqiy madaniyatni avaylab asrash, tiklash qolaversa, zamon bilan hamohang qadam tashlash borasida katta islohotlar amalga oshirilmoqda. Milliy qadriyatlarimiz, urf-odatlarimiz, ma’naviy boyligimizga bo‘lgan e’tibor davlat miqyosiga ko‘tarildi. 2024-yil davomida ko‘plab davlat tadbirlari, tanlovlar, konsert-tomoshalar o‘tkazildi.

Kecha, 24-dekabr kuni poytaxtdagi “Xalqlar do‘stligi” san’at saroyida yil davomida faol ijod qilgan va muxlislari uchun yangi qo‘shiqlar taqdim etgan bir guruh ijodkorlarni rag‘batlantirish maqsadida, ilk bor “O‘zbegim-2024” milliy taqdimotining tantanali taqdirlash marosimi bo‘lib o‘tdi.

 Mazkur tadbirda madaniyat vaziri Ozodbek Nazarbekov, hamda madaniyat vazirligi rahbariyati, markaziy apparati, tizim tashkilotlari rahbarlari, ijodkorlar va taniqli san’atkorlar va ommaviy axborot vositalari vakillari ishtirok etdi.

Joriy yil davomida o‘z ijodi bilan xalq qalbidan joy olgan quyidagi bir qator ijodkorlar 11 ta nominatsiya bilan taqdirlandi:

“Millat kuychisi” maxsus nominatsiyasi bilan Farrux Zokirov, G‘ulomjon Yoqubov, “Yilning eng faol ijodkori” – Muhammadziyo, “Yilning eng yaxshi estrada guruhi” - “Benom” guruhi, “Yilning eng yaxshi shou konserti” -  Lola Yo‘ldosheva, “Yilning eng yaxshi so‘z ustasi” - Avaz Oxun, “Yil qo‘shig‘i” - Ozoda Nursaidova, “Yil yangi ovozi” - Shohrux Ergashev, “Estradamiz nostalgiyasi” - Dj Pilligrim, “Yilning eng yaxshi ayol xonandasi” - Ozoda Nursaidova, “Yilning eng yaxshi erkak xonandasi” - Hamdam Sobirov, “Vatanparvarlik tarannumi uchun” - Sevara Nazarxon, “O‘zbekkonsert” e‘tirofi” – Imron, “Mavzuli yorqin qo‘shiqlari uchun” - Osman Navro‘zov, “Ijodiga nisbatan kreativ yondashuvlari uchun” - Shohruhxon, “Madaniy tadbirlardagi faolligi uchun” - Jahongir Poziljonov, “O‘zbek estrada san’ati rivojiga qo‘shgan hissasi uchun” - Rayhon G‘aniyeva taqdirlanishdi.

Shuningdek tadbir davomida O‘zbekiston Respublikasi Prezidentining Farmoniga asosan, “O‘zbekiston xalq artisti” mukofoti bilan taqdirlangan Tojikiston Respublikasining iste’dodli ijodkori Nigina Amanqulovaga madaniyat vaziri Ozodbek Nazarbekov tomonidan mukofot tantanali topshirildi.

Ma’lumot uchun, g‘oliblar uzbekkonsert.uz saytida o‘tkazilgan so‘rovnoma natijalariga ko‘ra aniqlandi. Bu ochiq va shaffof tanlov tizimi muxlislarning o‘z sevimli ijodkorlariga ovoz berish imkoniyatini taqdim etdi. 

 “O‘zbegim-2024” milliy taqdimoti - o‘zligimizni anglab borayotgan bir davrda ota-bobolarimizdan meros bo‘lib kelgan milliy musiqiy madaniyatimizni asrab avaylash, milliy san’atimizni rivojlantirish va eng asosiysi kelajak avlodni musiqiy tafakkurini shakllantirishda mustahkam poydevor bo‘ladi.

Biz uchinchi ming yillik ijodkorini, avvalo ijodiy intiluvchan, ruhiy qadriyatlar dunyosini  ilhomlantiradigan, o‘zining mustaqil dunyoqarashiga ega ijodkor shaxs sifatida ko‘rishni istaymiz.

Mazkur marosim Madaniyat vazirligi huzuridagi “O‘zbekkonsert” davlat muassasasining yosh va iqtidorli ijrochilarni, estrada xonandalarini, ijodkorlarni qo‘llab-quvvatlash, qo‘shiqlarning badiiy saviyasini oshirish, badiiy yuksak musiqa asarlari yaratishni rag‘batlantirish kabi muhim vazifalarini amalga oshirish yo‘lidagi yana bir qadam bo‘ldi.

Tadbir nafaqat yutuqlarni e’tirof etish, balki keng jamoatchilikka qadriyatlarga asoslangan bugungi o‘zbek san’atining jozibasini targ‘ib qilish maqsadida tashkil etildi. 

Eslatib o‘tamiz, “O‘zbegim-2024” milliy taqdimoti Madaniyat vazirligi huzuridagi “O‘zbekkonsert” davlat muassasasi tomonidan birinchi marotaba o‘tkazildi.