O‘zbekiston Respublikasi Madaniyat vazirligi

Mazkur madaniy dastur italiyalik tomoshabinlarga 100 nafarga yaqin o‘zbekistonlik san’at va madaniyat sohasi vakillari tomonidan o‘zbek san’atining betakror jozibasini his qilish va uning jahon madaniyatidagi ahamiyatini anglash imkonini berdi. 

Madaniy tadbir doirasida Italiyaning Rim va Viarejjio shaharlarida Alisher Navoiy nomidagi O‘zbekiston davlat akademik katta teatri simfonik orkestri gala-konserti italiyalik hamda u yerda istiqomat qiluvchi o‘zbekistonliklarga taqdim etildi. Xususan, tomoshalarga o‘zbekistonlik dunyoga mashhur futbolchi Eldor Shomurodov ham tashrif buyurdi. 

Shuningdek, Italiyadagi madaniyat kunlari doirasida ikki davlat o‘rtasidagi madaniy aloqalarni yanada mustahkamlash maqsadida, O‘zbekiston madaniyat vaziri o‘rinbosari Yusufjon Usmonov boshchiligidagi delegatsiya bir qator italiyalik madaniyat sohasi vakillari bilan uchrashdi. Jumladan,  Italiya madaniyat vaziri o‘rinbosari Janmarko Massi bilan hamkorlik uchrashuvi bo‘lib o‘tdi.  

"O‘zbekiston va Italiya – bu ikki buyuk madaniyatga ega davlatlar. Italiya san’at va tamaddun markazi sifatida jahon tarixida muhim o‘rin egallasa, O‘zbekiston Sharq va G‘arbni bog‘lovchi qadimiy sivilizatsiyalar chorrahasi bo‘lib kelgan. Bu zamin Al-Xorazmiy, Ibn Sino, Farg‘oniy kabi buyuk alloma vatani bo‘lib, o‘zining boy madaniy merosi bilan ajralib turadi. Davlatlarimiz o‘rtasidagi aloqalar tarixiga nazar solsak bu uzoq tarixga ega. Xususan, sohibqiron Amir Temur davrida davlatlarimiz o‘rtasida yaqin aloqalar o‘rnatildi. Hozirgi kunda davlatlarimiz o‘rtasidagi madaniy hamkorlik yuqori darajaga ko‘tarildi. O‘zbekiston Respublikasi Hukumati va Italiya Respublikasi Hukumati o‘rtasida 2024-2026-yillarga mo‘ljallangan madaniy hamkorlik dasturi imzolandi. Ushbu hujjatga asosan, hamkorligimiz yanada rivojlanib bormoqda" - dedi Yusufjon Usmonov uchrashuv davomida.  

Uchrashuv doirasida ikki davlatning madaniy hamkorligini yanada rivojlantirish uchun bir qator takliflar ilgari surildi:  

Birinchi, ikki davlat teatrlari o‘rtasida hamkorlikni yanada rivojlantirish, xususan, o‘zbek teatrlari texnik mutaxassislari Italiya teatrlarida malakasini oshirish masalasini ko‘rib chiqish;  

Ikkinchi, madaniyat sohasidagi ta’lim muassasalari o‘rtasida hamkorlikni yo‘lga qo‘yish, o‘zaro tajriba almashish, o‘qituvchi va talabalar almashinuvini yo‘lga qo‘yish;  

Uchinchi, madaniyat markazlarini boshqarish sohasida o‘zaro hamkorlik qilish;

To‘rtinchi, O‘zbekiston madaniyat vazirligi huzurida nomoddiy madaniy merosni tadqiq qilish va uni asrash bo‘yicha ilmiy institut tashkil etilgan. Ushbu institut bilan shu sohada faoliyat olib boruvchi Italiya tashkiloti o‘rtasida aloqalarni yo‘lga qo‘yish;  

Beshinchi, 2025-yilda O‘zbekistonda Italiya madaniyati kunlarini o‘tkazish;

Oltinchi, 2025-yilda O‘zbekistonda Marko Poloning 770 yilligiga bag‘ishlangan tadbirlarni o‘tkazish.  

Yuqoridagi hamkorliklarni amalga oshirish maqsadida, ikki davlat vazirliklari o‘rtasida 2025-2027-yillarga mo‘ljallangan chora-tadbirlar Dasturini imzolash taklif etildi.

Shuningdek, xizmat safarining navbatdagi kunlarida O‘zbekiston madaniyat vaziri o‘rinbosari Yusufjon Usmonov boshchiligidagi delegatsiya quyidagi bir necha italiyalik madaniyat sohasi vakillari bilan uchrashdi: Italiyaning mashhur festivali Pucchini xalqaro festivali prezidenti Fabritsio Mirakolo,  “MAGISTER ART” kompaniyasi rahbari Renato Saporito, Auditorium Parco della Musica Ennio Morricone konsert muassasalari kompleksi rahbariyati hamda O‘zbekistonning Italiyadagi elchixonasi vakillari.  

Uchrashuvlar yakunida Italiyadagi O‘zbekiston madaniyati kunlari ikki mamlakat xalqlari o‘rtasidagi do‘stlik, o‘zaro hamjihatlik va madaniy hamkorlik ramziga aylanishi ta’kidlandi.

Italiyadagi O‘zbekiston madaniyati kunlari doirasida Rimning “Teatro Italia” teatrida va Viarejjioning “Teatro Eden” teatrida Alisher Navoiy nomidagi O‘zbekiston davlat akademik katta teatri simfonik orkestrining gala konserti bo‘lib o‘tdi.

Ma’lumot o‘rnida, O‘zbekiston Prezidentining “Opera va balet san’atini yanada rivojlantirish chora-tadbirlari to‘g‘risida”gi PQ–64-son qaroriga asosan milliy opera va balet san’atini jahon miqyosida keng targ‘ib etish, ilg‘or xorijiy tajribalarni o‘rganish hamda madaniy aloqalarni yanada kengaytirish maqsadida, Alisher Navoiy nomidagi O‘zbekiston davlat akademik katta teatri simfonik orkestrining navbatdagi xorijiy gala-konserti Italiyadagi “O‘zbekiston madaniyati kunlari” doirasida bo‘lib o‘tdi. 

Alisher Navoiy nomidagi O‘zbekiston davlat akademik katta teatri jamoasining xorijiy davlatlarga gastrol safarlarini tashkil etish O‘zbekiston Prezidentining PQ–64-son qaroriga asosan, 2022 — 2026-yillarga mo‘ljallangan rejaga binoan 2022-yildan buyon xorijiy gastrol safarlarini tashkil etib kelmoqda.

Jumladan, 2022-yilda Koreya Respublikasining Tegu, Pusan, Kochang, Pxyontxek shaharlari bo‘ylab hamda Ozarbayjon Respublikasi Boku shahrida, shuningdek, 2023-yilda Xitoy Xalq Respublikasining Pekin shahrida, Rossiyada, Qozog‘iston Respublikasining Astana shahrida, Belarus Respublikasining Minsk shahrida hamda 2024-yilda Qirg‘iz Respublikasining Bishkek shahrida, Turkiyaning Istanbul va Bursa shahsrlarida, Italiyaning Rim va Viarejjio shaharlarida gastrol safarlarini tashkil etildi.