Assalomu alaykum, hurmatli uchrashuv ishtirokchilari! Hurmatli hamkasblar, delegatsiya aʼzolari! Xonimlar va janoblar!

O‘zbekiston delegatsiyasi nomidan Rossiya Federatsiyasining mehmondo‘st zaminida bo‘lganimizning ilk daqiqalaridanoq bizga iliq munosabat va e’tibor uchun samimiy minnatdorchilik bildirishga ijozat bergaysiz!

2024-yil O‘zbekiston Respublikasi, ayniqsa, Hamdo‘stlikning madaniy poytaxtiga aylangan Samarqand shahri uchun muhim yil bo‘ldi. Hamdoʻstlik madaniyati poytaxtlari dasturi madaniy meros boyligini namoyish etish va Hamdoʻstlik davlatlari oʻrtasida madaniy almashinuvni rivojlantirishga qaratilgan noyob tashabbusdir.

O‘zbekiston uchun, ayniqsa, bu yil madaniyat poytaxti faxriy unvoniga sazovor bo‘lgan Samarqand uchun bu alohida sharaf va mas’uliyatdir. Samarqand 2 750 yillik tarixga ega, Rim, Afina va Bobil bilan tengdosh boʻlgan dunyodagi eng qadimiy shaharlardan biridir. Shahar Zarafshon daryosi oʻrta oqimining chap sohilida, Oʻzbekiston Respublikasining eng markazida joylashgan. Samarqand azaldan siyosatchilar, ishbilarmonlar va sayohatchilarning e’tiborini tortgan. U buyuk Temur davrida o‘zgacha ravnaq va ulug‘vorlikka erishdi. Shahar Buyuk Ipak yo‘lining muhim chorrahasi bo‘lib, qulay geografik mavqe’ga ega edi. Samarqandda shakllarning mukammalligi va rang-barangligi bilan hayratlanarli o‘rta asr me’morchiligining ajoyib namunalari saqlanib qolgan. Bugungi kunda Samarqand meʼmoriy yodgorliklari jahon madaniy merosining ajralmas qismini tashkil etadi, ular jahon sivilizatsiyasining chinakam durdonalaridir. Shahar YUNESKOning Jahon merosi ro‘yxatiga kiritilgan.

Samarqand bugun ham o‘zining amaliy san’ati va xalq hunarmandchiligi bilan mashhurdir. Samarqand so‘zanasi, zargarlik buyumlari, kulolchilik buyumlari, mashhur Samarqand nonlari, butun dunyoda o‘xshashi bo‘lmagan mashhur Samarqand qog‘ozi ko‘plab mamlakatlarda keng tanilgan.

Bugun esa samarqandlik ustalarning iste’dodli asarlari Nyu-York, Parij, Berlin, London, Sankt-Peterburg va MDHning boshqa shaharlaridagi muzeylar zallarini bezab turibdi.

2024-yilda biz ushbu dastur bilan sezilarli yutuqlarga erisha oldik. Sizni joriy yilda amalga oshirilgan asosiy yutuq va tadbirlar bilan tanishtirishga ruxsat bergaysiz:

Joriy yilning 1-5 aprel kunlari Xalqaro madaniyat festivali va “Samarqand – Hamdo‘stlik madaniyati poytaxti”ning tantanali ochilishi tashkil etildi.

Samarqand MDH davlatlaridan ko‘plab mehmonlar va ishtirokchilarni qabul qilgan madaniy almashinuv markaziga aylandi. Festival turli tadbirlarni o‘z ichiga oldi: ko‘rgazma va kontsert dasturlari, O‘zbekiston va MDHga a’zo davlatlar vakillarining mahorat darslarigacha bo‘lgan mazkur tadbir bizga mintaqamizning o‘ziga xos an’analari va san’atini namoyish etish imkonini berdi, shuningdek, xalqlarimiz o‘rtasidagi aloqalarni mustahkamlashga xizmat qildi.

Yil davomida turli madaniy tadbirlar, mahorat darslari, ko‘rgazmalari tashkil etildi. Joriy yilning 26-30-avgust kunlari Samarqand shahrida tashkil etilgan “Sharq taronalari” xalqaro musiqa festivalida Hamdo‘stlikka a’zo davlatlardan kelgan mehmonlar o‘rtasida o‘ziga xos ijobiy muhitning guvohi bo‘ldik. Noyabr oyida Samarqandda yuqori darajadagi loyihaning yopilish marosimini o‘tkazishni rejalashtirganmiz. Barchangizni ushbu tadbirga taklif qilaman! Madaniy hamkorlik va almashinuvni ilgari surishda davom etish bo‘yicha majburiyatimiz o‘zgarishsiz qolmoqda. Ishonchimiz komilki, Samarqand madaniy poytaxt sifatida bundan buyon ham xalqlarimiz o‘rtasidagi do‘stlik va o‘zaro hamjihatlikni mustahkamlashga ko‘maklashuvchi madaniy-gumanitar hamkorlik markazi bo‘lib qoladi.

E’tiboringiz va “Hamdo‘stlikning madaniy poytaxtlari” davlatlararo dasturini amalga oshirishdagi faol ishtirokingiz uchun tashakkur bildiraman.

E’tiboringiz uchun rahmat!