Vazir Ozodbek Nazarbekov Samarqandning madaniyat tizimi xodimlari bilan ochiq muloqot o‘tkazdi
2026-06-11 19:45:00 / Yangiliklar
Bugun, 11-iyun kuni madaniyat vaziri Ozodbek Nazarbekov xizmat safari bilan Samarqand viloyatida bo‘ldi.
Viloyatga safar doirasida Madaniyat boshqarmasi hamda tizim tashkilotlari rahbar va xodimlari ishtirokida ochiq muloqot o‘tkazdi.
Ochiq muloqot davomida kun tartibidagi ikki muhim masalaga alohida e’tibor qaratildi. Xususan, muhtaram Prezidentimiz tomonidan 2026-yil 21-aprelda qabul qilingan 150-son Qaror hamda 2026-yil 2-iyunda qabul qilingan 103-son Farmonning mazmun-mohiyati, ularning soha taraqqiyotidagi ahamiyati va hujjatlarda belgilangan vazifalar ijrosini ta’minlash masalalari yuzasidan keng muhokamalar o‘tkazildi.
Ta’kidlanganidek, mazkur hujjatlar madaniyat va san’at sohasida mutlaqo yangi yondashuvlarni joriy etish, boshqaruv tizimini takomillashtirish, madaniy xizmatlar sifatini oshirish va davlat-xususiy sheriklik munosabatlarini kengaytirishga qaratilgan bo‘lib, sohada tarixiy ahamiyatga ega tub burilish yasaydigan hujjatlar hisoblanadi.
Muloqot davomida Samarqand viloyati madaniyat tizimi rahbarlari va mas’ul xodimlari oldiga qator aniq vazifalar qo‘yildi. Jumladan, viloyatda faoliyat yuritayotgan barcha xususiy teatrlar bilan alohida uchrashuvlar tashkil etish, ularga Farmonda nazarda tutilgan imtiyoz va imkoniyatlar bo‘yicha batafsil tushuntirish ishlarini olib borish hamda xususiy teatrlarni davlat muassasalari bilan hamkorlikka keng jalb etish vazifasi belgilandi.
Shuningdek, Samarqand viloyati Madaniyat boshqarmasi boshlig‘i Botir Tugalovga Samarqand viloyati hokimligiga madaniy tadbirlar tashkil etish direksiyasi faoliyatini yo‘lga qo‘yish bo‘yicha aniq takliflar kiritish;
Mahallalarda madaniy-ma’rifiy muhitni yanada kuchaytirish maqsadida, madaniyat bo‘limlari tomonidan har bir hudud kesimida 50 tadan 100 tagacha manzilli ro‘yxatlar shakllantirish hamda ushbu yo‘nalishda “Mahalla yettiligi” bilan yaqin hamkorlikni yo‘lga qo‘yish;
Hududdagi kutubxonalar faoliyatini tizimli tashkil etish maqsadida ularning yagona reyestrini shakllantirish va muntazam yuritib borish;
Bolalar musiqa va san’at maktablari hamda ixtisoslashtirilgan ta’lim muassasalari o‘rtasida hamkorlikni kuchaytirish, aholi gavjum hududlari va turizm obyektlarida qo‘shma konsert dasturlari va madaniy chiqishlarni muntazam tashkil etish kabi vazifalar yuklatildi.
Bu kabi tadbirlar yosh ijodkorlarni qo‘llab-quvvatlash bilan birga, aholi va mehmonlarning madaniy hordiq chiqarishi uchun ham xizmat qilishi qayd etildi.
Vazir Ozodbek Nazarbekov Samarqand viloyati yil yakuniga qadar barcha yo‘nalishlar bo‘yicha namunaviy ko‘rsatkichlarga erishishi shartligini ta’kidlab, buning uchun viloyatda yetarli imkoniyatlar, infratuzilma va inson resurslari mavjudligini qayd etdi.
Ochiq muloqot yakunida yuqorida belgilangan topshiriqlar ijrosini ta’minlash maqsadida, Samarqand viloyati madaniyat boshqarmasi tomonidan alohida “Yo‘l xaritasi” ishlab chiqilishi bo‘yicha topshiriq berildi.