“Barqaror orollar: Amudaryoning quyi oqimi va Orol dengizi havzasida ekotizimini saqlash”) mavzusidagi parallel tadbir bo‘lib o‘tdi
2026-06-02 16:00:00 / Yangiliklar
2-iyun kuni “Eco Expo Central Asia 2026” xalqaro ko‘rgazmasi doirasida “Islands of Resilience: Sustaining Ecosystem Services in the Lower Amu Darya and Aral Sea Basin” (“Barqaror orollar: Amudaryoning quyi oqimi va Orol dengizi havzasida ekotizimini saqlash”) mavzusidagi parallel tadbir bo‘lib o‘tdi. Tadbir Orolbo‘yi ekotizimlarini tiklash, yer va suv resurslarini barqaror boshqarish, bioxilma-xillikni saqlash hamda mintaqaning iqlimiy barqarorligini oshirish masalalariga bag‘ishlandi.
Tadbir Ekologiya va iqlim o‘zgarishi bo‘yicha Milliy qo‘mita tomonidan BMT Taraqqiyot Dasturi (UNDP) va Global Ekologik Jamg‘arma (GEF) bilan hamkorlikda amalga oshirilayotgan “Aral Sea Wetlands Project” loyihasi doirasida tashkil etildi.
Tadbirda Ekologiya vaziri o‘rinbosari Jusipbek Kazbekov, UNDPning O‘zbekistondagi doimiy vakili o‘rinbosari Anas Fayyad Karman, Suv xo‘jaligi vazirining birinchi o‘rinbosari Zokir Ishpulatov, Qishloq xo‘jaligi vaziri o‘rinbosari Alisher Shukurov, shuningdek FAOning O‘zbekistondagi vakili Sherzod Umarov tabrik so‘zlari bilan ishtirok etdilar.
Sessiya davomida ishtirokchilar Orolbo‘yi mintaqasining ekologik inqirozdan barqaror ekotizimlarni shakllantirish bosqichiga o‘tishi, iqlim bosimi sharoitida suv resurslarini boshqarishni takomillashtirish, iqlimga moslashgan qishloq xo‘jaligini joriy etish hamda yer degradatsiyasining neytral balansiga erishish bo‘yicha yondashuvlarni muhokama qildilar.
Suv-botqoqli hududlar va qirg‘oqbo‘yi ekotizimlarining bioxilma-xillikni saqlash, ekotizim xizmatlarining barqarorligini ta’minlash hamda mahalliy aholi uchun daromad manbalarini yaratishdagi ahamiyatiga alohida e’tibor qaratildi.
Texnik sessiya doirasida “Aral Sea Wetlands Project” loyihasining xalqaro texnik maslahatchisi Joshua Brann Amudaryoning quyi oqimidagi ekotizimi va barqaror turmush manbalari ahamiyati haqida ma’ruza qildi. BMTning Cho‘llanishga qarshi kurashish konvensiyasi (UNCCD) Kotibiyatining bosh ilmiy xodimi doktor German Kust yer degradatsiyasining neytral balansi vositalari va yer resurslaridan foydalanishni barqaror rejalashtirish yondashuvlari haqida so‘z yuritdi.
Shuningdek, ekspert Vasiliy Lobkovskiy mahalliy darajada yer resurslaridan kompleks foydalanishni rejalashtirishning amaliy mexanizmlarini taqdim etdi.
Ochiq munozara davomida ishtirokchilar hamkorliklarni kengaytirish, innovatsion yechimlarni joriy etish va Orol dengizi mintaqasida ekotizimlarni tiklash bo‘yicha muvaffaqiyatli tajribalarni keng ko‘lamda qo‘llash istiqbollarini muhokama qildilar.
Landshaftlarni kompleks boshqarish, suv resurslarini muhofaza qilish, iqlim o‘zgarishiga moslashish, shuningdek davlat organlari, xalqaro tashkilotlar, ilmiy hamjamiyat va ekologik tashabbuslar o‘rtasidagi hamkorlikni mustahkamlash masalalariga alohida urg‘u berildi.
Mazkur qo‘shma tadbir O‘zbekistonning Orolbo‘yi ekotizimlarini tiklash borasidagi sa’y-harakatlarini namoyish etish hamda tabiiy resurslarni boshqarishning barqaror yondashuvlarini mintaqaviy va xalqaro darajada ilgari surish uchun muhim platformaga aylandi.