O‘zbekiston Respublikasi Madaniyat vazirligi

Qozon shahrida bo‘lib o‘tayotgan ICESCO Bosh konferensiyasining 15-sessiyasi doirasida ICESCO — Islom hamkorlik tashkilotiga a’zo davlatlar madaniyat vazirlarining uchrashuvi bo‘lib o‘tdi. Unda, 28 ta davlat va 3 ta xalqaro tashkilot vakillari ishtirok etdi.

Uchrashuvda O'zbekiston madaniyat vazirining birinchi o'rinbosari Bahodir Ahmedov ham ishtirok etib, nutq so’zladi.

“Islom hamkorlik tashkilotiga a’zo davlatlar madaniyat vazirlari uchrashuvi islom dunyosining boy madaniy merosini asrab-avaylash, uni yanada rivojlantirish va kelajak avlodlarga yetkazish borasidagi umumiy mas’uliyatimizni yana bir bor namoyon etadi. Bugungi kunda madaniyat nafaqat milliy o‘zlikning muhim asosi, balki do‘stlik ko‘prigi, o‘zaro anglashuv manbai va tinchlikni mustahkamlashning samarali vositasidir. Hozirgi murakkab va tez o‘zgarayotgan davrda madaniy hamkorligimizni yanada mustahkamlash, xalqlarimiz o‘rtasida o‘zaro ishonch, hurmat va hamjihatlikni kuchaytirish alohida ahamiyat kasb etmoqda. Islom dunyosining qudrati hamisha uning boy xilma-xilligi, ilmu ma’rifati, yuksak ma’naviyati va bebaho madaniyatida mujassam bo‘lib kelgan. Samarqanddan Qozongacha, Buxorodan Rabotgacha, Toshkentdan Dohagacha, Jakartadan Dakargacha bo‘lgan umumiy merosimiz bizga shuni eslatadiki, sivilizatsiya xalqlar bir-birini hurmat qilgan, o‘zaro ishonchni mustahkamlagan va tinchlik sari hamjihatlik bilan birgalikda harakat qilgan taqdirdagina taraqqiy etadi. O‘zbekiston uchun madaniyat hamisha muloqot, ochiqlik va hamkorlikning mustahkam poydevori bo‘lib kelgan. Samarqand, Buxoro, Xiva, Termiz va Toshkent kabi qadimiy shaharlarimiz asrlar davomida ilm-fan, ma’naviyat, hunarmandchilik, madaniyat va sivilizatsiyalararo muloqotning yirik markazlari sifatida xizmat qilgan. Shu munosabat bilan O‘zbekiston Islom hamkorlik tashkiloti doirasidagi hamkorlikni yuksak qadrlaydi. Ishonchimiz komilki, mamlakatlarimiz o‘rtasidagi madaniy sheriklikni yanada amaliy, samarali va yoshlar manfaatlariga yo‘naltirilgan tarzda rivojlantirish umumiy maqsadlarimizga xizmat qiladi” – dedi Bahodir Ahmedov nutqi davomida.

Islom dunyosi ta’lim, fan va madaniyat tashkiloti — ICESCOning 15-Bosh konferensiyasi bugun Rossiya Federatsiyasining Tatarstan Respublikasi poytaxti Qozon shahrida o‘z ishini davom ettirmoqda.