O‘zbekiston Respublikasi Madaniyat vazirligi

Kuni kecha madaniyat va san’at sohasida boshqaruv tizimini takomillashtirish hamda xususiy sektor ishtirokini kengaytirishga qaratilgan Prezident qarori ijrosi yuzasidan madaniyat vaziri Ozodbek Nazarbekov raisligida yig‘ilish bo‘lib o‘tdi.

Unda vazirlik markaziy apparati mas’ullari, hududiy boshqarmalar rahbarlari hamda soha mutaxassislari ishtirok etdi. Yig‘ilish davomida qarorda belgilangan ustuvor vazifalarni amaliyotga joriy etish, boshqaruv tizimini soddalashtirish va samaradorligini oshirish masalalari muhokama qilindi.

Vazir Ozodbek Nazarbekov o‘z so‘zida madaniyat va san’at muassasalarida zamonaviy boshqaruv mexanizmlarini joriy etish, byurokratik to‘siqlarni kamaytirish hamda hududiy tizimlarning mustaqilligini kuchaytirish zarurligini ta’kidladi.

Shuningdek, xususiy sektor ishtirokini kengaytirish, davlat-xususiy sheriklik asosida yangi loyihalarni amalga oshirish, nodavlat madaniyat muassasalarini qo‘llab-quvvatlash masalalariga alohida e’tibor qaratildi. Bu borada investorlar uchun qulay shart-sharoitlar yaratish va rag‘batlantirish mexanizmlarini takomillashtirish yuzasidan aniq topshiriqlar berildi.

Yig‘ilishda sohani moliyalashtirish manbalarini takomillashtirish, shuningdek, madaniyat muassasalarining o‘z daromadlarini oshirish imkoniyatlarini kengaytirish masalalari ham ko‘rib chiqildi.

Bundan tashqari, madaniyat obyektlarini modernizatsiya qilish, raqamli texnologiyalarni joriy etish hamda kadrlar malakasini oshirish bo‘yicha ustuvor vazifalar belgilab olindi.

Yig‘ilish yakunida mas’ullarga qaror ijrosini o‘z vaqtida va sifatli ta’minlash, belgilangan topshiriqlarni tizimli nazorat qilish bo‘yicha tegishli ko‘rsatmalar berildi.