O‘zbekiston Respublikasi Madaniyat vazirligi

Bishkekda “Turkiy dunyo madaniy merosi sohasida strategik yo‘nalishlarni belgilash va harakatlar rejalarini tasdiqlash” haqida Turkiy madaniyat va merosi jamg‘armasi Kengashining 3-yig‘ilishi bo‘lib o‘tdi.

Unda, Turkiy madaniyat va meros jamg‘armasi Prezidenti Aktoti Raimkulova, Turkiy Davlatlar Tashkiloti Bosh kotibi Kubanichbek Omuraliyev, shuningdek, O‘zbekiston Respublikasi madaniyat vaziri Ozodbek Nazarbekov, Qirg‘iz Respublikasi madaniyat, axborot va yoshlar siyosati vaziri Mirbek Mambetaliyev, Qozog‘iston Respublikasi madaniyat va axborot vaziri o‘rinbosari Oybek Sidiqov, Ozarbayjon Respublikasi madaniyat vaziri o‘rinbosari Saodat Yusifova va Turkiya Respublikasining Qirg‘iz Respublikasidagi elchisi Mekin Mustafa hamda rasmiy vakillar ishtirok etdi.

Yig‘ilishda delegatsiya a’zolari “Turkiy dunyo nigohi – 2040” hujjatini, TURKTIME tashabbusi va Turkiy dunyo Xartiyasi doirasida, turkiy madaniy merosini saqlash, rivojlantirish va kelajak avlodlarga yetkazish bo‘yicha loyihalarni muhokama qilishdi.

Shuningdek, uchrashuv davomida Jamg‘armaning 2025-yilgi faoliyati ko‘rib chiqilib, amalga oshirilayotgan loyihalar va tashabbuslarning amalga oshirilishini baholashdi va 2026–2027-yillar uchun ustuvor ish yo‘nalishlari belgilab olindi.

Shu bilan birga, madaniy merosni saqlash va raqamlashtirish, ilmiy tadqiqotlar sohasidagi hamkorlikni kengaytirish, qo‘shma xalqaro dasturlarni amalga oshirish va turkiy makon doirasida gumanitar muloqotni mustahkamlashga alohida e’tibor qaratildi.

"Bugungi kunda xalqaro nizolar, globallashuv, raqamlashtirish, sun’iy intellekt, kreativ iqtisod kabi so‘zlarni har kuni eshitamiz. Bu so‘zlar jamiyatimiz hayotini o‘zgartiruvchi kuchga egaligi va inson madaniyatiga ta’sir etishi bilan muhimdir. Bunday jarayonda o‘xshash qadriyatlarga ega turkiy xalqlar yanada birlashishi, umumiy merosimizni saqlash yuzasidan birgalikda harakat qilishi lozim. Biz madaniy merosimizni ilmiy o‘rganishimiz, ularni saqlash uchun axborot texnologiyalaridan samarali foydalanishimiz zarur. Hammamizga ma’lumki yosh avlod o‘z hayotini raqamli texnologiyalar va sun’iy intellektsiz tasavvur qila olmaydigan bir davrga keldik. Zamon talablariga moslashish uchun madaniy merosni asrash bilan birga, yangi madaniy mahsulotlar va ijod namunalarini yaratishimiz ham zarur deb hisoblaymiz. Bizning merosimiz bizga ko‘plab qahramonlarni taqdim etgan. Bu qahramonlar xalq og‘zaki ijodi, dostonlar va buyuk adiblarimiz ijodida namoyon bo‘ladi. Afsuski, ularni zamon talablari asosida yosh avlodga yetkazishda kamchiliklarimiz bisyor. Shuningdek, ijtimoiy tarmoqlar hayotimizning ajralmas qismiga aylandi. Ijtimoiy tarmoqlarning foydalari bilan birga bir qator “madaniy xavflar”i ham kun tartibiga chiqib kelmoqda. Xususan, inson qadrini moddiy ne’matlar, brendlar va tashqi ko‘rinish orqali baholash tendensiyasi, qisqa videolar, layk, xayp, trendga ergashish hamda axborotni qisqa, parchalangan “shorts” shaklida qabul qilishga o‘rganish kuchaymoqda. Yuqoridagilarning barchasi insonni ma’naviy shaxsdan iste’molchiga, fuqarodan tomoshabinga, ijodkordan kuzatuvchiga aylantirib qo‘ymoqda.

Hurmatli yig‘ilish ishtirokchilari!

Yuqoridagi kabi illatlarni oldini olish uchun, Jamg‘arma kabi xalqaro tashkilotlar doirasida faol hamkorlik qilishni maqsadga muvofiq deb hisoblaymiz" - dedi O‘zbekiston Respublikasi madaniyat vaziri Ozodbek Nazarbekov Kengashning 3-yig‘ilishidagi nutqi davomida.

Kengashning 3-yig‘ilishi yakunida jamg‘armaga a’zo davlatlar o‘rtasida bayonnoma imzolandi.

Jamg‘armaning 3-Kengash yig‘ilishining Qirg‘iz Respublikasida o‘tkazilishi Turkiy madaniyati va merosi jamg‘armasi tomonidan tashkil etilgan yillik yig‘ilishlar amaliyotini davom ettirdi, bu amaliyot ilgari Ozarbayjon Respublikasida (2024-yilda) va Qozog‘iston Respublikasida (2025-yilda) o‘tkazilgan bo‘lib, Turk dunyosi mamlakatlari o‘rtasida madaniy hamkorlikni mustahkamlash va barqaror o‘zaro ta’sirni rivojlantirish bo‘yicha uning missiyasini izchil amalga oshirayotganini namoyish etadi.

Ma’lumot o‘rnida, Turkiy madaniyati va merosi jamg‘armasi turkiy davlatlar rahbarlarining tashabbusi va ko‘magida turkiy xalqlarning moddiy va nomoddiy madaniy merosini saqlash, o‘rganish va targ‘ib qilish, shuningdek, turkiy davlatlar o‘rtasida ilmiy, nashriyot va gumanitar hamkorlikni rivojlantirish maqsadida tashkil etilgan xalqaro tashkilotdir.