O‘zbekiston Respublikasi Madaniyat vazirligi

Poytaxtdagi Alisher Navoiy nomidagi O‘zbekiston davlat akademik katta teatrida Xitoyning bahor – Chuntse yangi yil bayramiga bag‘ishlangan konsert dasturi bo'lib o'tdi.

STadbir avvalida O‘zbekiston Respublikasi madaniyat vazirining birinchi o‘rinbosari Avazxon Tadjixanov so’zga chiqdi.

“Bugungi kunda O‘zbekiston va Xitoy o‘rtasidagi munosabatlar har tomonlama strategik sheriklik darajasiga ko‘tarilib, davlat rahbarlarimiz tomonidan belgilab berilgan ustuvor yo‘nalishlar asosida izchil va barqaror rivojlanib bormoqda. O‘zbekiston Respublikasi Prezidenti Shavkat Mirziyoyev ta’kidlaganidek, “Xitoy — ko‘p ming yillik tarixga ega, jahon sivilizatsiyasi taraqqiyotiga beqiyos hissa qo‘shgan buyuk madaniyat va ma’naviyat makonidir”. Ana shu yuksak baho ikki xalq o‘rtasidagi o‘zaro hurmat va ishonchga asoslangan munosabatlarning ma’naviy poydevorini yaqqol ifodalaydi. Ayniqsa, madaniyat va san’at sohasidagi hamkorlik strategik sherikligimizning muhim tarkibiy qismi hisoblanadi. Qo‘shma festivallar, konsert dasturlari, kino va teatr sohasidagi loyihalar, madaniy almashinuvlar xalqlarimizni yanada yaqinlashtirib, o‘zaro anglash va do‘stlikni mustahkamlamoqda.

Davlatimiz rahbari yana bir bor ta’kidlaganidek, “madaniyat — xalqlarni bir-biriga bog‘laydigan eng ishonchli ko‘prik”. Shu ma’noda, O‘zbekiston va Xitoy o‘rtasida amalga oshirilayotgan madaniy-gumanitar hamkorlik ikki xalqning boy tarixi, an’analari va ma’naviy qadriyatlarini chuqur anglashga xizmat qilmoqda.

Biz ushbu hamkorlikni kelgusida ham yangi tashabbuslar, qo‘shma ijodiy loyihalar va doimiy muloqotlar orqali yanada kengaytirishdan manfaatdormiz” - dedi Avazxon Tadjixanov.

So’ng, Xitoy Xalq Respublikasining O‘zbekiston Respublikasidagi Favqulodda va Muxtor Elchisi janob Yu Szun nutq qilib, O‘zbekiston va Xitoy o’rtasidagi munosabatlarning mustahkamlanayotganligi haqida so’zladi.

Konsert dasturida Xitoyning Futszyan provinsiyasidan tashrif buyurgan san’at jamoalari hamda O‘zbekistonning M.Turg‘unboyeva nomidagi “Bahor” davlat raqs ansambli san’atkorlari rang-barang chiqishlari orqali Xitoy va O‘zbekiston madaniyatining betakror jozibasini namoyon etishdi.

Tadbir yakunida mehmonlar va san’atkorlar ishtirokida umumiy suratga tushildi.

Tadbir do‘stona muhitda, ko‘tarinki kayfiyatda o‘tdi.