O‘zbekiston Respublikasi Madaniyat vazirligi

Yunus Rajabiy nomidagi O‘zbek milliy musiqa san’ati instituti “Maqom cholg‘u ijrochiligi” kafedrasi professori Malikaxon Ziyayevaning 70 yillik yubileyi hamda 55 yillik sermahsul ijodiy faoliyatiga bag‘ishlangan “San’atga baxshida umr” nomli ijodiy kechasi bo’lib o’tdi.

Tadbir avvalida vazir maslahatchisi Jamshid Niyazbekov madaniyat vaziri Ozodbek Nazarbekovning tabrigini o’qib eshittirdi, unda shunday deyilgan edi: “O‘zbekiston Respublikasi Madaniyat vazirligi va shaxsan o‘z nomimdan Sizni 70 yoshingiz bilan chin qalbimdan muborakbod etib, eng ezgu va samimiy tilaklarimni yo‘llayman.
70 yil – bu nafaqat hayot yo‘lingiz, balki o‘zbek milliy musiqa san’ati, xususan, an’anaviy ijrochilikmaktabi rivojlanishi hamda shakllanishida ustozlikan’anasining yorqin sahifasidir. 

Sizning ko‘p yillik ijodiy faoliyatingiz, boy tajribangiz hamda mustahkam pedagogik maktabingiz yuksak professionalizm va fidoyilik namunasidir. O‘zbek an’anaviy ijrochiligi, xususan, dutor san’atining nodir an’analarini asrab-avaylash hamda uni yangi bosqichga olib chiqish borasidagi xizmatlaringiz soha mutaxassislari va keng jamoatchilik tomonidan yuksak e’tirofga sazovor bo‘lgan.
Siz yaratgan samarali ijodiy va pedagogik maktab bugungi kunda milliy san’atimizning davomiyligini ta’minlab kelmoqda. 

Sizning rahbarligingiz va o‘gitlaringiz ostida kamol topgan o‘nlab shogirdlar bugun respublikamiz hamda xalqaro miqyosdagi nufuzli san’at dargohlarida milliy merosimizni munosib targ‘ib etib kelayotgani tahsinga loyiqdir.

O‘z navbatida, Sizning ko‘p yillik fidokorona mehnatingiz davlatimiz tomonidan munosib taqdirlanib, “O‘zbekistonda xizmat ko‘rsatgan artist” unvoni bilan taqdirlanishingiz, san’atimiz rivojiga qo‘shgan ulkan hissangizning yorqin isbotidir.

Fursatdan foydalanib, Sizni tavallud kuningiz bilan yana bir bor tabriklab, sihat-salomatlik, uzoq umr va ustozlik borasidagi ishlaringizda kuch-quvvat tilayman.”

Ijodiy kecha davomida Malikaxon Ziyayevaning o‘zbek milliy musiqa san’ati, xususan dutor ijrochiligi maktabini rivojlantirish, an’anaviy maqom yo‘llarini asrab-avaylash, ustoz-shogirdlik an’analarini mustahkamlash hamda yosh ijrochilarni tarbiyalash borasidagi beqiyos xizmatlari alohida e’tirof etildi. 

Mazkur ijodiy kechada Vazirlik tasarrufidagi oliy ta’lim muassasalarini rahbar-xodimlari, yetuk professor-o‘qituvchilar, olimlar, musiqashunoslar, bastakorlar va iqtidorli talaba- yoshlar bilan birga san’at shinavandalari ishtirok etdi. 

Ijodiy kecha dasturi yuksak badiiy saviyada tuzilgan bo‘lib, unda o‘zbek mumtoz musiqa san’atining durdonalari, maqom yo‘llari, an’anaviy va zamonaviy dutor ijrochiligi namunalari keng o‘rin olgan. Konsert dasturidan “Yor bilib”, “Ey dilbari janonim”, “Adolat tanovori”, “Jonon o‘ynasin”, “Dutor bayoti”, “Qo‘qoncha”, “Dutor lazgisi”, “Bebokcha”, “An’anaviy terma (baxshiyona)”, “Dugoh Husayniy”, “Samarqand ushshog‘i” kabi asarlar joy olgan bo‘lib, ular yurtimizning taniqli san’atkorlari, xalq hofizlari, professor-o‘qituvchilar, respublika va xalqaro tanlovlar g‘oliblari tomonidan ijro etildi. Shuningdek, tadbirda “Shukrona” professional dutorchilar ansambli, “G‘anijon Toshmatov nomidagi dutorchi qizlar” ansambli, Yunus Rajabiy nomidagi maqom ansambli hamda xorijiy mehmon ijrochilar, jumladan, AQShning Kaliforniya shtati Santa-Kruz universiteti professori Tanya Merchant ishtirok etdi. 

Mazkur ijodiy kechada Vazirlik tasarrufidagi oliy ta’lim muassasalari rahbarlari, yetuk professor-o‘qituvchilar, olimlar, musiqashunoslar, bastakorlar, san’at ahli hamda iqtidorli talabalar ishtirok etishi rejalashtirilgan.
“San’atga baxshida umr” ijodiy kechasi o‘zbek milliy musiqa san’atining bebaho an’analari, dutor ijrochiligi maktabining bugungi taraqqiyoti va ustoz-shogirdlik rishtalarining mustahkamligini keng jamoatchilikka namoyon etuvchi, yurtimiz madaniy hayotidagi muhim voqea sifatida o‘tkazilishi kutilmoqda.