O‘zbekiston Respublikasi Madaniyat vazirligi

Madaniyat vazirligida 2025-yilda amalga oshirilgan ishlar sarhisobi hamda 2026-yil uchun ustuvor vazifalarni belgilash yuzasidan dastlabki muhokama bo‘lib o‘tdi. Unda vazirning birinchi o‘rinbosari Avazxon Tadjixanov, vazir o‘rinbosari Murodjon Majidov va vazirlik markaziy apparati vakillari ishtirok etdi.

Avval xabar berilganidek, 2025-yil sohada ijobiy o‘zgarishlar yili bo‘ldi. Tasdiqlangan ish rejalari asosida quyidagi natijalarga erishildi:

— “Navro‘z sadolari”, IV Xalqaro baxshichilik san’ati, “Xalqaro hunarmandchilik” festivallari hamda “Oltin kuz” iqtidorli ijodkorlar forumi tashkil etildi;

— 9 ta xalqaro festival va 20,5 mingta konsert-tomosha tadbirlariga 11,8 millionga yaqin aholi qamrab olindi. 22 marotaba “Madaniyat karvoni”, 8 ta “Yulduz bilan sayohat” loyihasi hamda “Madaniyat to‘lqinlari” media loyihasi o‘tkazildi;

— Nomoddiy meros yo‘nalishida 14 ta mahalliy va 3 ta xorijiy ekspeditsiya tashkil etildi. 20 nafar baxshining dostoni “Oltin fond” uchun yozib olindi. 12 ta mahorat darsi, 5 ta seminar va 13 ta respublika hamda xalqaro konferensiya o‘tkazildi;

— Badiiy havaskorlik jamoalari tomonidan 53 ta turistik obyektlarda 2 491 ta chiqish, shuningdek, askiya va qiziqchilar ishtirokida 23 ta teatrlashtirilgan konsert tashkil etildi;

— 11 636 ta spektakl namoyishiga 3,9 million nafar tomoshabin tashrif buyurdi. Teatrlarning 58 ta xorijiy va 270 ta mahalliy gastrol safarlari amalga oshirildi;

— 160 ta yangi spektakl sahnalashtirildi. Ular milliy zamonaviy, xorijiy va tarixiy asarlar asosida yaratildi;

— Bolalar musiqa va san’at maktablari 5 turdagi milliy cholg‘u asboblari (qashqar rubobi, dutor, doira, nay, g‘ijjak)dan iborat jami 1,4 mingta to‘plam bilan ta’minlandi;

— 559 tasi xalqaro, 689 tasi respublika jurnallarida jami 1,2 mingta ilmiy maqola chop etildi. Tizimdagi oliy ta’lim muassasalarida ilmiy daraja va unvonga ega kadrlar soni 16 nafarga oshdi;

— 16 ta madaniyat muassasasi (13 ta madaniyat markazi, 1 ta istirohat bog‘i va 2 ta boshqa obyekt) 46,6 milliard so‘mlik bitim asosida davlat-xususiy sheriklikka berildi;

— Yoshlar o‘rtasida 14 ta tanlov va festival o‘tkazildi. Ularda 1 200 nafardan ortiq ijodkor yosh qatnashib, 175 nafari g‘olib va sovrindor bo‘ldi;

— 11 ta davlatda “O‘zbekiston madaniyat kunlari”, O‘zbekistonda esa 4 ta davlatning madaniyat kunlari tashkil etildi. Sohada 7 ta davlat bilan xalqaro huquqiy hujjat imzolandi;

— Xitoyda Alisher Navoiy ijodiy merosini o‘rganish bo‘yicha ilmiy ekspeditsiya tashkil etildi;

— “Botir Zokirov memorial muzeyi” faoliyati yo‘lga qo‘yildi.

Yig‘ilishda, shuningdek, yaqin kunlarda o‘tkaziladigan Madaniyat vazirligi Hay’at yig‘ilishiga 2025-yil yakunlari va 2026-yil ustuvor vazifalari yuzasidan kiritiladigan masalalar muhokama qilindi.