Kecha, 28-yanvar kuni poytaxtda madaniyat va san’at sohasidagi nufuzli loyihalardan biri bo‘lgan — “Yangi O‘zbekiston yulduzlari” milliy mukofoti bu yilda o‘zgacha ruh va keng qamrov bilan o‘tkazildi.

To‘rtinchi bor tashkil etilgan ushbu tadbirga qator yangiliklar kiritildi. Xususan, ilk marotaba xorijiy davlatlarda o‘zbek madaniyati va san’atini faol targ‘ib qilayotgan hamdo‘stlik mamlakatlari vakillari uchun “Yilning eng yaxshi xorijdagi o‘zbek madaniyati targ‘ibotchisi” nominatsiyasi joriy etildi. Ushbu yangilik mukofotning xalqaro darajaga ko‘tarilayotganidan dalolat beradi.

Shuningdek, tantanali marosimda madaniyat vazirining birinchi o‘rinbosari Avazxon Tadjixanov, vazir o‘rinbosarlari Murodjon Majidov va Yusufjon Usmonov hamda madaniyat va san’at sohasi vakillari, xorijiy mehmonlar ishtirok etdi. Jumladan, 2025-yilda dunyo miqyosida xitga aylangan “Homay” qo‘shig‘i ijrochilari — Boshqirdistonning “Ay Yola” guruhi, Tojikistonda xizmat ko‘rsatgan artist, O‘zbekiston xalq artisti Nigina Amonqulova, Ozarbayjon xalq artisti Mensum Ibrahimov hamda O‘zbekiston va Ozarbayjon xalq artisti Gulyanaq Memedova mehmon sifatida qatnashdi.

Tadbir davomida xalqaro maydonda o‘zbek milliy madaniyati va san’ati nufuziga, o‘zining samarali mehnati bilan soha rivojiga munosib hissa qo‘shayotgan xorijiy san’atkorlarning bir guruhiga -  Tojikistonda xizmat ko‘rsatgan artist, O‘zbekiston xalq artisti - Nigina Amonqulova; Ozarbayjon xalq artisti - Mansum Ibrahimov;  O‘zbekiston va Ozarbayjon xalq artisti - Gulyanaq Mammadova; Boshqirdiston Respublikasining “Ay-Yola” guruhi prodyuseri - Ruslan Shayxitdinov; Boshqirdiston Respublikasining “Ay-Yola” guruhi xonandasi - Adel Shayxitdinova; Boshqirdiston Respublikasining “Ay-Yola” guruhi xonandasi - Rinat Ramazanovlarga O‘zbekiston Respublikasi Madaniyat vazirligining "Madaniyat va san’at fidokori" ko‘krak nishoni taqdim etildi.  

Musiqiy kompozitsiyalarga boy konsert dasturi davomida madaniyat va san’at sohasida 2025-yil davomida yuqori natijalarga erishgan, respublika va xalqaro tadbirlarda faol ishtirok etgan sohaning munosib vakillari 20 ta nominatsiyada “Yilning eng yaxshi erkak maqom xonandasi”, “Yilning eng yaxshi ayol maqom xonandasi”, “Yilning eng yaxshi opera ijrochisi”,”Yilning eng yaxshi spektakli”, “Yilning eng yaxshi teatr aktyori”, “Yilning eng yaxshi teatr aktrisasi”, “Yilning eng yaxshi teatr rejissyori”, “Yilning eng yaxshi dramaturgi”, “Yilning eng yaxshi badiiy filmi”, “Yilning eng yaxshi sirk artisti”, “Yilning eng yaxshi askiyachisi”, “Yilning eng yaxshi qiziqchisi”, “Yilning eng yaxshi rangtasvir rassomi”, “Yilning eng yaxshi yosh baxshisi”, “Yilning eng yaxshi folklor jamoasi”, “Yilning eng yaxshi raqqosasi”, “Yilning eng yaxshi ayol estrada xonandasi”,“Yilning eng yaxshi erkak estrada xonandasi”, “Yilning eng yaxshi xorijdagi o‘zbek madaniyati targ‘ibotchisi”, “Yilning eng yaxshi madaniyat markazi” bo‘yicha taqdirlandi.

Milliy mukofotga yangi qo‘shilgan “Yilning eng yaxshi xorijdagi o‘zbek madaniyati targ‘ibotchisi” nominatsiyasiga ilk nomzodlar, yaponiyalik Mashu Komazaki, qozog‘istonlik Arman Nurmaxamatuli hamda  ozarbayjonlik Sahib Pashshazadelar kiritilib, ulardan qozog‘istonlik Arman Nurmaxamatuli to‘plangan ovozlar soniga ko‘ra g‘olib deb topildi.

Mukofotga sazovor bo‘lgan ijodkorlar mukofotning maxsus statuetkasi hamda sertifikati, shu bilan birga, bazaviy hisoblash miqdorining 100 baravari miqdorida pul mukofoti bilan moddiy rag‘batlantiriladi.

Tantali taqdirlash marosimi joriy yilning 28-yanvar kuni poytaxtdagi “Renessans Hall” binosida bo‘lib o‘tib, tantanali taqdirlash marosimi ZO‘R TV telekanali orqali jonli efirda namoyish etildi.

Tadbir yakunida ommaviy axborot vositalari uchun vazirlik Matbuot xizmati rahbari Sirojiddin O‘sarov tomonidan brifing tashkil etilib, jarayon yakunlari yuzadidan axborot berildi.

Ma’lumot o‘rnida, O‘zbekiston Respublikasi Prezidentining 2023-yil 25-dekabrdagi “Aholiga madaniy xizmat ko‘rsatish darajasini yanada oshirish chora-tadbirlari to‘g‘risida” PQ–406-son hamda Vazirlar Mahkamasining “Yangi O‘zbekiston yulduzlari” madaniyat va san’at milliy mukofoti to‘g‘risidagi nizomni tasdiqlash haqida” 2022-yil 14-oktyabrdagi 594-son qarori ijrosini ta’minlash maqsadida “Yangi O‘zbekiston yulduzlari” madaniyat va san’at milliy mukofoti muntazam o‘tkazilib kelinmoqda.