O‘zbekiston Respublikasi Madaniyat vazirligi

14-yanvar — O‘zbekiston Respublikasi Qurolli Kuchlari tashkil etilganining 34 yilligi hamda Vatan himoyachilari kuni munosabati bilan O‘zbekiston Badiiy akademiyasida “Mard o‘g‘lonlar nomi barhayot” nomli  ko‘rgazmaning ochilish marosimi va ma’naviy-ma’rifiy tadbir  bo‘lib o‘tdi.

Tadbir O‘zbekiston Badiiy akademiyasi, O‘zbekiston Respublikasi Davlat xavfsizlik xizmati hamda Toshkent fotosuratlar uyi hamkorligida tashkil etildi.

Mazkur tadbir O‘zbekiston Respublikasi Prezidentining 2025-yil 1-dekabrdagi F-70-son Farmoyishi ijrosini ta’minlash maqsadida, “Milliy armiya — Ona yurt qalqoni, tinchligimiz posboni!” shiori ostida  Vatan himoyasi yo‘lida fidoyilik va jasorat ko‘rsatgan, xizmat burchini ado etish chog‘ida halok bo‘lgan harbiy xizmatchilar xotirasiga bag‘ishlandi.

Jamoat arboblari, ziyoli vakillar, Vatan himoyasi va el-yurtimiz tinchligi yo‘lida qahramonlarcha halok bo‘lgan harbiy xizmatchilar va xodimlarning oila a’zolari, yaqinlari  ishtirok etgan tadbirning dastlabki qismi Badiiy akademiyaning Anjumanlar zalida bo‘lib o‘tdi.

Unda Vatan himoyasi yo‘lida o‘z jonini ayamagan mard o‘g‘lonlar xotirasiga bag‘ishlab tayyorlangan videolavha namoyish etildi, qahramon harbiy xizmatchilarning siymosi, ularning ko‘rsatgan jasorati va fidoyiligi yana bir bor yodga olindi. Mazkur video tomoshabinlarda chuqur ma’naviy taassurot qoldirdi, tinch va osoyishta hayotning naqadar bebaho ekani, u qanday fidoyilik, mardlik va jon evaziga ta’minlanayotganini teran anglashga chorladi.

Shundan so‘ng tadbirda O‘zbekiston Badiiy akademiyasi raisi, O‘zbekiston xalq rassomi Akmal Nur, O‘zbekiston Yozuvchilar uyushmasi raisi, O‘zbekiston xalq shoiri Sirojiddin Sayyid, O‘zbekiston Respublikasi Madaniyat vaziri o‘rinbosari Murodjon Madjidov, O‘zbekiston Respublikasi Vazirlar Mahkamasi huzuridagi Qatag‘on qurbonlari xotirasi davlat muzeyi direktori Baxtiyor Xasanov hamda O‘zbekiston xalq artisti Erkin Komilov so‘zga chiqdi.

Notiqlar  so‘nggi yillarda olib borilayotgan keng ko‘lamli islohotlar natijasida milliy armiyamizning  salohiyati oshgani, O‘zbekiston Qurolli Kuchlari mamlakatimiz xavfsizligi va barqarorligini, sarhadlarimiz daxlsizligini ta’minlashga qodir bo‘lgan, harakatchan va puxta qurollangan qudratli kuchga aylangani, bugungi tinch va osoyishta hayot zamirida harbiy xizmatchilarning fidoyi va mas’uliyatli xizmati turgani, o‘z hayotini ona yurt himoyasidek ulug‘ ishga bag‘ishlagan harbiylarimiz bilan doimo faxrlanishimiz lozimligini alohida ta’kidlashdi. Xizmat burchini ado etish chog‘ida halok bo‘lgan harbiylarning jasorati xalqimiz xotirasida abadiy saqlanishi, ularning nomini ulug‘lash va xotirasini e’zozlash bugungi va kelajak avlodning muqaddas burchi ekani qayd etildi.

Shundan so‘ng, O‘zbekiston Badiiy akademiyasining “Akademiya” galereyasida “Mard o‘g‘lonlar nomi barhayot” nomli badiiy ko‘rgazma ochildi.

Ko‘rgazmada xizmat burchini ado etish chog‘ida halok bo‘lgan 25 nafar harbiy xizmatchining portretlari namoyish etildi. Portretlar O‘zbekiston Badiiy akademiyasi tizimidagi ta’lim muassasalarining professor-o‘qituvchilari tomonidan yaratilgan bo‘lib, har bir asarda Vatan yo‘lida jon fido qilgan qahramonlarning matonati, jasorati va sadoqati badiiy ifodasini topgan.

Ko‘rgazma orqali tomoshabinlar  nafaqat qahramonlarning jasorati bilan tanishdi, balki ularning Vatan yo‘lida fido bo‘lgan hayotini yanada yaqin his qilish imkoniyatiga ega bo‘ldi. Portretlarda aks etgan qahramonlarimiz siymosi  Vatan himoyachilariga nisbatan hurmat va ehtirom hissini mustahkamladi.

Ko‘rgazma doirasida O‘zbekiston Yozuvchilar uyushmasi tomonidan vatanparvarlik ruhidagi badiiy adabiyotlar ham taqdim etildi. Ushbu kitoblar Vatan himoyasi, jasorat va xotira mavzularini yoritishga xizmat qiluvchi ma’naviy manba sifatida ko‘rgazma ekspozitsiyasidan o‘rin oldi hamda tadbirning umumiy g‘oyaviy mazmunini boyitdi. Tadbir mehmonlariga mazkur adabiyotlar xotira va ehtirom ramzi sifatida sovg‘a tariqasida tarqatildi.

Mazkur ko‘rgazma Vatanimiz tinchligi, mustaqilligi va osoyishtaligini ta’minlash yo‘lida jonini fido qilgan mard o‘g‘lonlar xotirasiga chuqur hurmat va ehtirom ifodasi bo‘lib, Milliy armiyamizning 34 yillik shonli yo‘li hamda bugungi tinch hayotimizning naqadar bebaho ekanini yana bir bor yodga solgan muhim voqelik bo‘ldi.