O‘zbekiston Respublikasi Madaniyat vazirligi

Kuni kecha Madaniyat vazirligida respublikadagi davlat teatrlari va teatr-studiyalarining 2026-yilgi ijodiy rejalari yuzasidan tahliliy va tanqidiy muhokama bo‘lib o‘tdi.  

Muhokamada, madaniyat vazirining birinchi o‘rinbosari Avazxon Tadjixanov, shuningdek, vazirlikning markaziy apparati, O‘zbekiston Teatr arboblari uyushmasi, O‘zbekiston davlat san’at va madaniyat instituti vakillari ishtirok etishdi.

Muhokama davomida mamlakatimizda mavjud 41 ta davlat teatrlarining faoliyatini yanada jonlantirish, repertuar siyosatini zamon talablari asosida takomillashtirishga qaratilgan bir qator muhim masalalar ko‘rib chiqildi.

Mutaxassislar tomonidan g‘oyaviy va madaniy-tarbiyaviy ahamiyati yetarli bo‘lmagan asarlar tanqidiy baholanib, ularning o‘rniga mazmunan boy, san’at mezonlariga javob beradigan badiiy sahna asarlari tanlab olinishi taklif etildi.

Shu jumladan, repertuarlarni shakllantirishda bugungi kunning eng dolzarb ijtimoiy, ma’naviy va g‘oyaviy muammolariga alohida e’tibor qaratilib, tarixiy, milliy klassika, zamonaviy hamda xorij dramaturgiyasining eng sara, yuksak badiiy saviyadagi asarlarini sahnaga olib chiqish ustuvor vazifa sifatida belgilandi.

Yo‘lga qo‘yiladigan bir qator islohotlar davomida musiqali drama yo‘nalishidagi teatrlarda janr talablaridan kelib chiqib, sahnalashtiriladigan asarlarda musiqiy yechimlarga alohida e’tibor qaratish yuzasidan qat’iy ko‘rsatmalar berildi.

Shuningdek, ijodiy jamoalarga malakali adabiy maslahatchilarni biriktirish hamda xorijiy hamkorlar bilan ishlash orqali keng qamrovli va ustuvor vazifalarga ega bo‘lgan badiiy-ijtimoiy sahna asarlarini taqdim etish yo‘lida muhim qadam tashlandi.

2026-yilgi ijodiy rejalarning bunday chuqur tahlili teatrlar faoliyatini yangi bosqichga olib chiqishida, tomoshabin talabi hamda zamon ruhiga mos, ta’sirchan va badiiy barkamol sahna asarlarini yaratish yo‘lidagi muhim strategik qadam bo‘ldi.