Botir Zokirov nomidagi Milliy estrada san'ati institutining mediaga qiziquvchi talabalari bilan muloqot qilindi
2025-12-02 18:10:00 / Yangiliklar
Avval xabar berilganidek, ayni kunlarda vazirlik Matbuot xizmati tomonidan vazirlik tasarrufidagi oliygoy talabalari bilan uchrashuvlar o'tkazilib, mediaga qiziquvchi ko'ngilli yoshlar jamoasi shakllantirilmoqda.
Bugun, 2-dekabr kuni O'zbekiston davlat konservatoriyasi huzuridagi Botir Zokirov nomidagi Milliy estrada san'ati institutining talabalari bilan ham uchrashuv o'tkazilib, ochiq muloqot qilindi. Unda, 20 nafarga yaqin talabalar ixtiyoriy ishtirok etishdi.
Mazkur uchrashuvlarning asosiy maqsadi — mediaga qiziquvchi ko'ngilli yoshlar jamoasi shakllantirish va yoshlar o‘rtasida media savodxonligini oshirish, ommaviy axborot vositalari faoliyatiga qiziqishi bor talabalarga amaliy ko‘mak ko‘rsatish hamda ularni sohaga yanada yaqinlashtirishdir.
Muloqot davomida Matbuot xizmati rahbari Sirojiddin O'sarov talabalarga zamonaviy media trendlari, axborotlar bilan ishlash madaniyati, faktcheking, ijtimoiy tarmoqlar uchun sifatli kontent yaratish usullari, jurnalistik etika hamda rasmiy axborot siyosatining ahamiyati haqida batafsil ma’lumot berdi.
Shuningdek, mediaga alohida qiziqish bildirgan, ijodkorlik qobiliyatiga ega bo‘lgan va tashabbuskor talabalar orasidan ko‘ngilli yoshlar jamoasi shakllantirilayotganligi va ushbu jamoa kelgusida vazirlikning turli media loyihalarida, videoreportajlar, fotolavhalar, matnli materiallar tayyorlashda hamda ijtimoiy tarmoqlar uchun kontent yaratishda faol ishtirok etishi rejalashtirilganligi ma'lum qilindi. Bu esa yoshlar uchun nafaqat amaliy tajriba, balki soha mutaxassislari bilan bevosita ishlash va o‘z kasbiy mahoratini rivojlantirish imkoniyatini yaratishi ta'kidlandi.
Barchaga ma'lumki, Botir Zokirov nomidagi Milliy estrada san'ati institutida bir qator yo'nalishlar qatori bastakorlik san’ati va
musiqiy ovoz rejissyorligi yo'nalishlari ham mavjud. Muloqot jarayonida talabalar o'zlarining ijodiy ishlarini amalda ko'rsatib berishdi.
Mazkur tashabbus yoshlarni ijodiy jarayonlarga jalb qilishda, ularning shaxsiy rivojlanishini qo‘llab-quvvatlashda hamda kelajakda malakali media vakillarini tayyorlash yo‘lidagi muhim qadam bo‘lib xizmat qilmoqda.