Qozog’istonning Aqtau shahridagi “Xalyk arena” majmuasida 2025-yilgi “Turkiy dunyoning madaniyat poytaxti” tadbirlarining tantanali yopilish marosimi bo’lib o’tdi
2025-11-29 14:10:00 / Yangiliklar
Unda O’zbekston Respublikasi madaniyat vaziri Ozodbek Nazarbekov, Qozog’iston Respublikasi madaniyat va axborot vaziri Aida Balayeva, Turkmaniston madaniyat vaziri Atageldi Shamiradov, TURKSOY Bosh kotibi Sulton Rayev, Turkiy davlatlar tashkiloti Oqsoqollar kengashi raisi Binali Yildirim va boshqa rasmiy shaxslar, diplomatik korpus vakillari, keng jamoatchilik ishtirok etdi.
Tadbirda TURKSOY Doimiy kengashining 42-yig’ilishi qarori bilan “Andijon shahri — 2026-yilda turkiy dunyoning madaniyat poytaxti” etib belgilangani e’lon qilinib, Andijon shahriga bag’ishlangan maxsus videorolik namoyish etildi.
Sahnaga Andijon shahar hokimi Elyorbek Karimov taklif qilindi. Unga “Turkiy dunyoning madaniyat poytaxti” maqomini ifodalovchi ramziy statuetka Mang’istov viloyati hokimi o’rinbosari Erbol Izbergenov tomonidan topshirildi. Shu tariqa estafeta Aqtau shahridan Andijon shahriga o’tdi.
Yopilish marosimida TURKSOYga a’zo davlatlar va boshqa turkiy tilli xalqlar san’at ustalari ishtirokida katta konsert dasturi namoyish etildi. Xususan, mamlakatimiz nomidan O‘zbekistonda xizmat ko‘rsatgan artist Gulbahor Erqulova, O’zbekiston davlat filarmoniyasi Xorazm viloyati bo’linmasi xonandasi Sherzod Ro’zmetov, “Bek” doirachilar guruhi sozandalari Saidakmalxo’ja Tursunxo’jayev, Dilmurodbek Bekmurodov hamda “Navbahor” ansambli raqqosalari ishtirok etdi. Ularning chiqishi olqishlar bilan kutib olindi.