O‘zMMSI va Maqom markazi hamkorligida institutda hududiy bo‘lim rahbarlari uchun seminar o‘tkazildi
2025-11-25 19:05:00 / Yangiliklar
Yunus Rajabiy nomidagi O‘zMMSI va O‘zbek milliy maqom san’ati markazi o‘rtasida sentyabr oyida imzolangan hamkorlik dasturi asosida bugun institutda Maqom markazining respublika bo‘yicha barcha hududiy bo‘lim rahbarlari ishtirokida seminar tashkil etildi.
Uchrashuvda O‘zMMSI rektori Eldor Shermanov, Maqom markazi bosh direktori Farruh Yunusov, shuningdek hududiy bo‘lim direktorlari, badiiy rahbarlar va administratorlar qatnashdi. Tadbir davomida hududiy markazlar faoliyatini baholash bo‘yicha KPI mezonlari aniqlashtirildi hamda keyingi bosqichlar uchun 22 ta ko‘rsatkich asosida vazifalar belgilandi.
Seminarda shuningdek maqom san’atini targ‘ib qilishning zamonaviy yondashuvlari, yoshlar ongiga singdirish bo‘yicha samarali usullar, mahalliy jamoalarda madaniy faollikni kuchaytirish kabi masalalar muhokama qilindi. Hududlarda o‘tkaziladigan ijodiy tadbirlar, uchrashuvlar va jamoatchilik bilan ishlash tizimining samaradorligini oshirish yuzasidan takliflar bildirildi.
Tadbirning muhim yo‘nalishlaridan biri PR va media faoliyatiga bag‘ishlandi. Unda maqom san’atini targ‘ib etishga qaratilgan media strategiyalar, veb-sayt va ijtimoiy tarmoqlar orqali kontent yaratish va tarqatish, ommaviy axborot vositalari bilan ishlash, videomaterial va fotoarxivni to‘g‘ri yuritish bo‘yicha aniq tavsiyalar berildi. Hududiy bo‘limlarning media faolligi oshirilishi, ijtimoiy tarmoqlarda yagona uslubni shakllantirish va muntazam axborot berib borish zarurligi ta’kidlandi.
Seminar davomida xorijiy davlatlarda faoliyat yuritayotgan turdosh markazlar tajribasi ham ko‘rib chiqildi va ularning samarali amaliyotlari asosida mahalliy markazlar faoliyatini takomillashtirish bo‘yicha takliflar ishlab chiqildi.
Uchrashuv O‘zMMSI va Maqom markazi o‘rtasidagi amaliy hamkorlikning yangi bosqichi bo‘lib, kelgusida qo‘shma loyihalar, ijodiy tashabbuslar va tizimli islohotlar uchun mustahkam zamin yaratadi.