Eksportchi korxonalar uchun fitosanitariya nazorati: amaliy muammolar va yechimlar
2026-01-15 20:40:00 / Yangiliklar
Eksportchi korxonalar uchun fitosanitariya nazorati: amaliy muammolar va yechimlar
Bugun O‘simliklar karantini va himoyasi agentligi tashabbusi bilan agentlik direktori Ibrohim Ergashev hamda Qoraqalpog'iston Respublikasi Jo‘qorg'i Kengesining qo‘mita raisi Anuarbek Jumanazarov ishtirokida eksportyor korxonalar vakillari bilan ochiq muloqot bo‘lib o‘tdi.
Tadbirda eksport faoliyati bilan shug‘ullanayotgan tadbirkorlik subyektlari, mutasaddi tashkilotlar vakillari hamda soha mutaxassislari ishtirok etdi.
Uchrashuvdan ko‘zlangan asosiy maqsad — o‘simliklar karantini va himoyasi sohasida eksportyor korxonalar duch kelayotgan muammolarni o‘rganish, mavjud tizimli masalalarni joyida muhokama qilish, amaldagi normativ-huquqiy talablar yuzasidan tushuntirishlar berish hamda tadbirkorlarni har tomonlama qo‘llab-quvvatlash orqali eksport salohiyatini oshirishdan iborat.
Shuningdek, ochiq muloqot ishtirokchilariga Agentlik tizimida korrupsiya holatlarini oldini olish maqsadida aloqa kanallari yo'lga qo'yilganligi to'g'risida ma'lumot berildi. Xususan, O'simliklar karantini va himoyasi agentligi tizimida xodimlar tomonidan turli qoidabuzarliklar, noqonuniy va korrupsion holatlar haqida xabar berish uchun
Ishonch telefoni: +99871 202-64-64
Telegram-bot: @uzdavkarantin_antikor_bot
Elektron pochta: anticorruption@karantin.uz
Facebook: @uzdavkarantin_rasmiy manzillarga murojaat qilish mumkin.
Tadbir yakunida Agentlik tomonidan eksportyor korxonalar bilan ochiq va tizimli muloqotni doimiy yo‘lga qo‘yish, ularning muammolarini tezkor hal etish, shuningdek, fitosanitariya talablari asosida sifatli va raqobatbardosh mahsulotlar eksportini kengaytirish borasidagi hamkorlikni yanada mustahkamlash muhimligi ta’kidlandi.