Hududlarni kompleks rivojlantirish dasturi: Xalqaro konsultantlar jamoasi amaliy missiyasini boshladi
2026-06-23 16:05:00 / Yangiliklar
Bugun Hazorasp tuman hokimligida Jahon banki ishtirokida amalga oshirilayotgan “O‘rta shaharlarni kompleks rivojlantirish” loyihasi doirasida xalqaro konsultantlar jamoasi vakillari bilan uchrashuv bo‘lib o‘tdi.
Uchrashuvda Ispaniyaning IDOM Consulting, Engineering and Architecture S.A.U hamda O‘zbekistonning Kibera Technology LLC kompaniyalari mutaxassislari, tuman hokimligi mas’ullari va tegishli tashkilotlar vakillari ishtirok etdilar.
Muloqot davomida O‘zbekiston Respublikasi Prezidentining tegishli qarorlari asosida Hazorasp tumanini “Yangi O‘zbekiston qiyofasidagi tuman” sifatida rivojlantirish, hududning ijtimoiy-iqtisodiy salohiyatini oshirish, muhandislik-kommunikatsiya infratuzilmasini takomillashtirish hamda aholi uchun qulay yashash va tadbirkorlik muhitini yaratishga qaratilgan istiqbolli rejalar muhokama qilindi.
Shuningdek, konsultantlar tomonidan tumanning mavjud holatini o‘rganish, zarur ma’lumotlarni to‘plash hamda hududni kompleks rivojlantirish bo‘yicha strategiya, fazoviy-hududiy reja va master-reja ishlab chiqish yuzasidan dastlabki ishlar boshlandi.
Uchrashuv yakunida tomonlar loyiha doirasida amalga oshiriladigan ishlar yuzasidan o‘zaro hamkorlikni yanada mustahkamlash bo‘yicha fikr almashdilar.
Hazorasp tuman hokimligi
Matbuot xizmati