O‘zbekiston Respublikasi Oliy taʼlim, fan va innovatsiyalar vazirligi

“Kelajakka qadam” dasturi hamda “Dolzarb 90 kun” tashabbusi doirasida o‘tkazilgan mazkur muhim tadbirda viloyatdagi oliy ta’lim muassasalarining 3 minga yaqin bitiruvchi talabalari qatnashib, 100 dan ortiq ish beruvchi korxonalar tomonidan 700 dan ziyod bo‘sh ish o‘rinlari taklif qilindi.

Ko‘rgazmaning ochilish marosimida Sirdaryo viloyati hokimining o‘rinbosari Shohrux Isoqulov, Guliston davlat universiteti rektori Mo‘hsin Hojiyev hamda “O‘zmilliybank” AJ “Kelajakka qadam” markazi direktori Elmurod Xoshimov so‘zga chiqdilar. Ular mazkur tadbirning yoshlar bandligini ta’minlashdagi o‘rni, ularni mustaqil hayotga tayyorlash va kelajakdagi maqsadlariga erishishlaridagi ahamiyati haqida to‘xtaldilar.

Tadbir doirasida bitiruvchi yoshlar uchun mavjud ish o‘rinlari va tadbirkorlik imkoniyatlari taqdim etildi. Shuningdek, viloyatdagi tadbirkorlar tomonidan bo‘sh ish o‘rinlari haqida ma’lumotlar berilib, “O‘zmilliybank” AJ tomonidan bank xizmatlari va mahsulotlari taqdimoti, bitiruvchi talabalarning innovatsion hamda startap loyihalari namoyishi ham tashkil etildi.

Bitiruvchi talabalar uchun ishga joylashgach, ularning kasbiy rivoji, shaxsiy brendi, yumshoq ko‘nikmalar (soft skills) hamda professional tarmoqlarga qo‘shilish kabi muhim yo‘nalishlarga bag‘ishlangan seminar-treninglar tashkil etildi. 

“O‘zmilliybank” ATB Sirdaryo viloyati boshqarmasi va “Kelajakka qadam” markazi mas’ullari tomonidan yoshlar uchun mavjud ish o‘rinlari, tadbirkorlik faoliyatini yo‘lga qo‘yish imkoniyatlari va moliya sohasi bilan bog‘liq dasturlar yuzasidan taqdimotlar o‘tkazildi.

Ularda yoshlarga ishga joylashish tartibi, bank tomonidan taklif etilayotgan bo‘sh ish o‘rinlari, shuningdek, o‘z biznesini boshlash istagida bo‘lganlar uchun mavjud imtiyozli kreditlar, moliyaviy maslahat xizmatlari va boshqa amaliy ko‘mak choralari haqida batafsil ma’lumot berildi.

Tadbirda tadbirkorlik g‘oyasi va loyihalariga ega bitiruvchi talabalar orasidan eng innovatsion va istiqbolli deya topilgan loyihalar mualliflariga ularni yanada rivojlantirish va amaliyotga tatbiq etish maqsadida imtiyozli kreditlar ajratildi. 27 nafar talabaning biznes loyilari taqdimoti o‘tkazilib, ular tadbirkorlikka yo‘naltirildi.

Shu bilan birga, ko‘rgazma doirasida bitiruvchi yoshlar uchun tadbirkorlik faoliyatini boshlash imkoniyatlari yuzasidan Sirdaryo viloyatidagi yetakchi korxonalar asoschilari bilan uchrashuv tashkil etildi. 

Unda viloyatda faoliyat yuritayotgan “DONIYOROVA AZIZA” YATT, “BETON SANOAT” MCHJ hamda “MILI TEKS SIRDARYO” MCHJ kabi nufuzli korxonalar rahbarlari ishtirok etib, talabalarga o‘zlarining biznes sohasidagi boy tajribasi, muvaffaqiyat sari bosib o‘tgan yo‘llari va shaxsiy hayot saboqlari haqida samimiy tarzda mulohaza va maslahatlar berdilar.

Ular davlatimiz rahbariyati tomonidan yoshlar uchun yaratilayotgan keng imkoniyat va qulayliklardan unumli foydalanish, doimo tashabbuskor, qat’iyatli va innovatsion fikrlovchi bo‘lishga chorladilar.

Uchrashuv davomida 1100 nafar talaba bilan suhbat o‘tkazilib, 500 nafarga yaqin bitiuvchi uchun ish o‘inlari aniqlandi.