Fargʻonada “TalabaExpo – 2025” kasb koʻrgazmasi tantanali tarzda ochildi
2025-07-24 12:00:00 / Vazirlik yangiliklari
Tadbirni Fargʻona viloyati hokimi oʻrinbosari Sherzodjon Polvonov, “Kelajakka qadam” markazi direktori Elmurod Hoshimov hamda Fargʻona davlat texnika universiteti rektori Oʻktam Salomov kirish so‘zi bilan ochib berishdi. Ular Toshkent va Samarqand shaharlaridan so‘ng ko‘rgazmaning Farg‘onada o‘tkazilishi viloyat yoshlari uchun katta imkoniyat ekanini ta’kidlashdi.
Shuningdek, oliy ta’lim muassasalarini bitirayotgan mutaxassislar uchun yaratilayotgan keng imkoniyatlar, ularning bandligini ta’minlash va kelajakdagi kasbiy faoliyatini qo‘llab-quvvatlash borasida olib borilayotgan izchil islohotlar haqida atroflicha ma’lumot berildi.
Ko‘rgazma doirasida bitiruvchi yoshlar uchun mavjud bo‘sh ish o‘rinlari, tadbirkorlik yo‘nalishidagi imkoniyatlar, shuningdek “Kelajakka qadam”, “Xotin-qizlar tadbirkorligi” kabi dasturlar asosida taklif etilayotgan imtiyozli kreditlar yuzasidan taqdimotlar tashkil etilmoqda.
“TalabaExpo – 2025” ko‘rgazmasi bitiruvchilarga o‘z salohiyati va qiziqishlariga mos kasb tanlash, mehnat bozorining real ehtiyojlari bilan yaqindan tanishish, shuningdek ish beruvchilar bilan bevosita muloqot qilish imkonini yaratmoqda.