“TechnoWays” texnologik rivojlanish marafonining respublika bosqichi gʻoliblari taqdirlandi
2024-10-11 19:00:00 / Vazirlik yangiliklari
Mazkur tadbirning yopilish marosimida Qoraqalpogʻiston Respublikasi Joʻqorgʻi Kengesining qoʻmita raisi T.Romanov, Qoraqalpogʻiston Respublikasi Vazirlar Kengashi Raisi oʻrinbosari B.Oʻtemuratov, Oliy taʼlim, fan va innovatsiyalar vazirining oʻrinbosari O.Mahkamov, Qoraqalpogʻiston Respublikasi Oliy taʼlim, fan va innovatsiyalar vaziri B.Qayipbergenov ishtirok etdi.
“TechnoWays” texnologik rivojlanish marafonining respublika bosqichi yopilish marosimi doirasida mehmonlar marafon ishtirokchilari tomonidan tayyorlangan innovatsion koʻrgazmalar bilan tanishdi. Mehmonlar loyihalarning amaliy qiymati va dolzarbligiga yuqori baho berdi. Koʻrgazma davomida yosh ishtirokchilar oʻz ishlanmalarining texnologik imkoniyatlari, ularning qoʻllanilishi va ijtimoiy ahamiyati haqida batafsil maʼlumot berdilar.
Shundan soʻng, tadbirning taqdirlash marosimi boʻlib oʻtdi. Unda soʻzga chiqqanlar “TechnoWays” marafonining mamlakatimizda texnologik rivojlanishni jadallashtirishda tutgan muhim oʻrnini taʼkidlab, ushbu tadbir yosh avlodni yuksak marralarga undaydigan platforma ekanligiga alohida urgʻu berdi. Marafon gʻoliblariga maxsus diplom va esdalik sovgʻalari topshirildi.