O‘zbekiston Respublikasi Ta’lim va ilm-fan vazirligi

Forum O‘zbekiston Respublikasi Ta‘lim va ilm-fan vazirligi hamda Ozarbayjon Respublikasi Fan va ta‘lim vazirligi hamkorligida tashkil etilib, unda ikki mamlakatdan 30 ga yaqin oliy ta’lim muassasasi vakillari ishtirok etdi.

Tadbir ta‘lim va ilm-fan sohasidagi hamkorlikni kengaytirish, ilmiy tadqiqotlar va innovatsiyalar yo‘nalishida qo‘shma tashabbuslarni ilgari surish, shuningdek, universitetlararo aloqalarni mustahkamlash maqsadida tashkil etildi.

Ozarbayjon Respublikasi fan va ta’lim vaziri Emin Amrullayev o‘z nutqida O‘zbekiston va Ozarbayjon o‘rtasida ta’lim hamda ilm-fan sohasidagi hamkorlikning rivojlanish dinamikasi, o‘zaro akademik aloqalarni kengaytirish va qo‘shma tashabbuslarni amalga oshirish haqida so‘z yuritdi.

Forum doirasida ikki mamlakatning yetakchi oliy ta’lim muassasalari rahbarlari ishtirokida panel muhokamalari tashkil etildi.

Unda universitetlar va sanoat korxonalari o‘rtasidagi hamkorlikni kuchaytirish, ilmiy tadqiqotlar natijalarini amaliyotga tatbiq etish, innovatsion salohiyatni oshirish hamda O‘zbekiston va Ozarbayjon oliy ta’lim muassasalari o‘rtasidagi xalqaro hamkorlikni rivojlantirish masalalari yuzasidan fikr almashildi.

Tadbir yakunida universitetlararo hamkorlikni kengaytirish, qo‘shma ilmiy va akademik tashabbuslarni amalga oshirishni nazarda tutuvchi 40 dan ortiq anglashuv memorandumi imzolandi.