O‘zbekiston Respublikasi Oliy taʼlim, fan va innovatsiyalar vazirligi

Forumni O‘zbekiston Respublikasi Oliy ta’lim, fan va innovatsiyalar vaziri Qo‘ng‘irotboy Sharipov hamda MDH Ijroiya qo‘mitasi raisi o‘rinbosari Ilhom Ne’matov ochib berdi. Ochilish marosimida so‘zga chiqqanlar bugungi kunda innovatsion rivojlanish jarayonlarida davlatlararo hamkorlikni kuchaytirish, ilmiy salohiyat va sanoat imkoniyatlarini birlashtirish dolzarb ahamiyat kasb etayotganini alohida ta’kidladilar.

Forum doirasida o‘tkazilgan “MDH innovatsion sanoati: davlatlararo hamkorlikning yangi modeli” mavzusidagi panel sessiya malakali xalqaro ekspertlar ishtirokida o‘tdi. Jumladan, O‘zbekiston Respublikasi Oliy ta’lim, fan va innovatsiyalar vaziri o‘rinbosari O‘ktam Salomov, MDH Iqtisodiy rivojlanish biznes markazi bosh direktori Vadim Ganin, Jahon xalqlari assambleyasi Bosh kengashi raisi, Rossiya Federatsiyasi Prezidenti huzuridagi Millatlararo munosabatlar bo‘yicha kengash a’zosi Svetlana Smirnova, Tatariston Respublikasi sanoat klasteri hamda Rossiya klasterlari biznes assotsiatsiyasi boshqaruvi raisi Sergey Mayorov, Ozarbayjon Fan va oliy ta’lim agentligi direktori o‘rinbosari Nijat Asadli, shuningdek, “Skolkovo” jamg‘armasi departamenti direktori Aleksandr Okunevlar spiker sifatida qatnashdilar.
Panel sessiya davomida davlatlararo sanoat va innovatsion siyosatning ustuvor yo‘nalishlari, barqaror hamkorlik mexanizmlarini shakllantirish, texnologiyalar transferi tizimini yo‘lga qo‘yish hamda innovatsion ekotizimni rivojlantirish masalalari keng muhokama qilindi. Shu bilan birga, sun’iy intellekt texnologiyalarini sanoatga joriy etish istiqbollari, raqamli transformatsiya jarayonlarini jadallashtirish, ilm-fan, ta’lim va ishlab chiqarish o‘rtasidagi integratsiyani kuchaytirish kabi dolzarb masalalarga alohida e’tibor qaratildi.
Anjuman ishtirokchilari tomonidan ilgari surilgan taklif va tashabbuslar umumlashtirilib, MDH mamlakatlari o‘rtasida ilmiy-texnologik zanjirlarni yanada mustahkamlash, innovatsion rivojlanishni jadallashtirish hamda ilm-fan va sanoat integratsiyasini amaliy bosqichga olib chiqish maqsadida maxsus qo‘shma ishchi guruh tashkil etishga kelishib olindi. Mazkur ishchi guruhning asosiy vazifasi innovatsion loyihalar, ilg‘or texnologiyalar va tajribalar bo‘yicha tezkor axborot almashinuvini yo‘lga qo‘yish, shuningdek, istiqbolli yo‘nalishlarda samarali hamkorlikni ta’minlashga qaratilishi belgilandi.
Shuningdek, ushbu kelishuvlar doirasida MDH hududida yagona innovatsion makonni shakllantirish, sun’iy intellekt, raqamli texnologiyalar va yuqori texnologik sanoat tarmoqlarida hamkorlikni kengaytirish rejalashtirilmoqda.
Forum yakunida ishtirokchilar “Innoprom. Markaziy Osiyo” ko‘rgazmasi pavilyonlari bilan yaqindan tanishdilar. Qariyb 18 ming kvadrat metr maydonni egallagan ko‘rgazmada eng zamonaviy texnologiyalar va innovatsion ishlanmalar namoyish etilmoqda. Milliy stend doirasida mamlakatimizning 400 ga yaqin yetakchi kompaniyalari, shuningdek, Rossiya Federatsiyasining 16 ta hududidan tashrif buyurgan delegatsiyalar ham faol qatnashib, investitsiyaviy va sanoat hamkorligini yanada mustahkamlashga qaratilgan muloqotlar olib bormoqda.