O‘zbekiston Respublikasi Oliy taʼlim, fan va innovatsiyalar vazirligi

Forumni Oʻzbekiston Respublikasi oliy taʼlim, fan va innovatsiyalar vaziri oʻrinbosari Oʻktam Salomov ochib berib, mamlakatda inson kapitalini rivojlantirish, taʼlim sifati va mehnat bozori talablari oʻrtasidagi uzviy bogʻliqlikni taʼminlash bugungi kundagi eng muhim ustuvor vazifalardan biri ekanini taʼkidladi.

Shuningdek, Toshkent menejment va iqtisodiyot instituti rektori Xojiakbar Axmedov hamda Oʻzbekiston Respublikasi Oliy taʼlim, fan va innovatsiyalar vazirligi huzuridagi Oliy taʼlimni rivojlantirish tadqiqotlari markazi direktori Abduvali Xoliqov oʻz maʼruzalari bilan ishtirok etib, taʼlim tizimini modernizatsiya qilish, kadrlar tayyorlash sifatini oshirish va ilmiy-tadqiqotlar samaradorligini kuchaytirish masalalariga alohida toʻxtalib oʻtdilar.

Forumning asosiy maqsadi: ish beruvchilar, oliy taʼlim muassasalari, davlat organlari va xalqaro tashkilotlar oʻrtasida ochiq va samarali muloqot maydonini yaratish, inson kapitalini rivojlantirish, mehnat bozorida talab yuqori boʻlgan professional koʻnikmalarni shakllantirish, bitiruvchilar bandligini oshirish hamda taʼlim tizimi va real sektor oʻrtasidagi hamkorlik mexanizmlarini takomillashtirishdan iborat.

Forum doirasida davlat boshqaruvi organlari rahbarlari, parlament vakillari, yirik kompaniyalar va banklar top-menejerlari, xalqaro tashkilotlar ekspertlari hamda oliy taʼlim muassasalari vakillari ishtirok etadi. Xususan, forumda taʼlim, bandlik, investitsiya, raqamli texnologiyalar va strategik islohotlar yoʻnalishidagi yuqori darajadagi mutasaddilar hamda yetakchi ish beruvchilar qatnashib, dolzarb masalalar yuzasidan oʻz fikr va takliflarini bildiradilar.

Forum dasturi ikki asosiy sessiyadan iborat boʻlib, birinchi sessiyada mehnat bozorining bugungi holati, global tendensiyalar, inson kapitalini rivojlantirish strategiyalari hamda raqamli transformatsiya jarayonlari muhokama qilindi. Ikkinchi sessiyada ish beruvchilar va taʼlim tizimi oʻrtasidagi hamkorlik, amaliy yechimlar, zamonaviy kadrlar tayyorlash modellari va kadrlar boshqaruvi jarayonlaridagi innovatsion yondashuvlar koʻrib chiqildi.

Shuningdek, forum doirasida istiqbolli startap va innovatsion loyihalar taqdimoti, biznes va taʼlim muassasalari oʻrtasida memorandumlar imzolash, hamkorlik aloqalarini kengaytirishga qaratilgan uchrashuvlar tashkil etildi.