Oʻzbekiston va Tojikiston oliygohlari rektorlari pedagogik taʼlim, ilmiy tadqiqotlar va raqamli texnologiyalar boʻyicha hamkorlik masalalarini muhokama qildilar
2026-03-13 19:45:00 / Vazirlik yangiliklari
Jumladan, pedagogik taʼlim va gumanitar fanlarga bagʻishlangan shoʻba yig'ilishida pedagog kadrlar tayyorlashni modernizatsiya qilish, qoʻshma taʼlim dasturlarini kengaytirish, til siyosati hamda akademik mobillikni rivojlantirish masalalari muhokama qilindi. Bu yoʻnalishda universitetlar oʻrtasida tajriba almashish va qoʻshma taʼlim loyihalarini amalga oshirish muhim ahamiyat kasb etishi taʼkidlandi.
Ilmiy tadqiqotlar va innovatsiyalarga bagʻishlangan seksiyada fundamental va amaliy tadqiqotlarni rivojlantirish, qoʻshma ilmiy markazlar tashkil etish, grant dasturlarida hamkorlik qilish hamda magistrant va doktorantlar tayyorlash masalalari koʻrib chiqildi. Unda ikki mamlakat olimlari oʻrtasidagi ilmiy aloqalarni yanada kuchaytirish muhimligi qayd etildi.
Muhandislik taʼlimi va raqamli texnologiyalar boʻyicha seksiyada IT-texnologiyalar, energetika, sanoat avtomatizatsiyasi, nanotexnologiyalar hamda universitetlarning sanoat korxonalari bilan hamkorligini rivojlantirish masalalari muhokama qilindi. Bu yoʻnalishda innovatsion texnologiyalarni taʼlim jarayoniga joriy etish va raqamli iqtisodiyot uchun kadrlar tayyorlash ustuvor vazifa sifatida belgilandi.
Shuningdek, tibbiy taʼlim va biotibbiyot tadqiqotlari boʻyicha seksiyada tibbiy kadrlar tayyorlash sifatini oshirish, qoʻshma klinik tadqiqotlar oʻtkazish, sogʻliqni saqlash tizimini raqamlashtirish hamda talabalar va ordinatorlar almashinuvini yoʻlga qoʻyish masalalari muhokama qilindi.
Turizm va xizmat koʻrsatish sohasiga bagʻishlangan seksiyada esa turizm industriyasi uchun raqobatbardosh kadrlar tayyorlash, xalqaro taʼlim dasturlarini rivojlantirish, madaniy diplomatiyani kuchaytirish hamda amaliy loyihalarni birgalikda amalga oshirish masalalari muhokama qilindi.
Forum doirasida oʻtkazilgan mazkur seksion muhokamalar ikki mamlakat universitetlari oʻrtasida ilmiy-taʼlimiy hamkorlikni yangi bosqichga olib chiqish, qoʻshma loyihalarni amalga oshirish hamda Markaziy Osiyoda umumiy akademik makonni shakllantirishga xizmat qilishi bilan ahamiyatlidir.