O‘zbekiston Respublikasi Oliy taʼlim, fan va innovatsiyalar vazirligi

S. Ayniy nomidagi Tojikiston davlat pedagogika universitetida boʻlib oʻtgan forumda Oʻzbekiston Respublikasi Oliy taʼlim, fan va innovatsiyalar vazirligi, Tojikiston Respublikasi Taʼlim va fan vazirligi rahbarlari, ikki mamlakatning yetakchi oliy taʼlim muassasalari rektorlari, olimlar va ekspertlar ishtirok etdi.

Tadbirning ochilish marosimida Tojikiston Respublikasi Taʼlim va fan vaziri Rahim Saidzoda, Oʻzbekiston Respublikasi Oliy taʼlim, fan va innovatsiyalar vaziri Qoʻngʻirotboy Sharipov hamda Oʻzbekistonning Tojikistondagi Favqulodda va Muxtor elchisi Ergash Shoismatov ishtirok etdilar. Forum doirasida ikki davlat oliy taʼlim tizimida amalga oshirilayotgan islohotlar, ilmiy-tadqiqotlar hamda innovatsion rivojlanish masalalari muhokama qilindi.

Vazir Qoʻngʻirotboy Sharipov oʻz nutqida Oʻzbekiston va Tojikiston oʻrtasida oliy taʼlim hamkorligi soʻnggi yillarda izchil rivojlanib borayotganini taʼkidlab, 2018-yilda ikki davlat hukumatlari oʻrtasida oliy taʼlim va ilm-fan sohasidagi hamkorlik toʻgʻrisidagi bitim imzolanishi ushbu yoʻnalishdagi aloqalarni yangi bosqichga olib chiqqanini qayd etdi.

Bugungi kunda ikki davlat oliy taʼlim muassasalari oʻrtasida 100 dan ortiq hamkorlik shartnomalari va memorandumlar amal qilmoqda. Shuningdek, qoʻshma taʼlim dasturlari doirasida talabalar tayyorlanmoqda hamda akademik almashinuv izchil rivojlanmoqda.

Vazir, shuningdek, hozirgi kunda Oʻzbekiston oliy taʼlim muassasalarida Tojikiston fuqarosi bo'lgan 700 dan ortiq talaba tahsil olayotganini, ikki mamlakat oliygohlari oʻrtasida ilmiy va taʼlim sohasida aloqalar tobora kengayib borayotganini alohida taʼkidladi.

Forumning yalpi majlisida oliy ta'lim muassasalari oʻrtasidagi akademik hamkorlikni yanada kengaytirish, qoʻshma taʼlim dasturlarini yoʻlga qoʻyish, ilmiy tadqiqotlarni birgalikda amalga oshirish, talabalar va professor-oʻqituvchilar akademik almashinuvini rivojlantirish kabi dolzarb masalalarga alohida eʼtibor qaratildi.