Taʼlimda sunʼiy intellekt texnologiyalarini qoʻllash va ulardan samarali foydalanish boʻyicha rektorlar forumi
2025-12-13 10:55:00 / Vazirlik yangiliklari
Ushbu nufuzli anjumanda respublika bo‘yicha 200 dan ortiq oliy taʼlim tashkilotlari rahbarlari, sohaning yetakchi mutaxassislari, mahalliy va xalqaro ekspertlar ishtirok etmoqda. Forumning asosiy maqsadi – mamlakatimiz oliy taʼlim tizimida sunʼiy intellekt texnologiyalarini kompleks joriy etish, taʼlim jarayonlari samaradorligini oshirish hamda raqamli transformatsiya jarayonlarini jadallashtirishdir.
Tadbirni O‘zbekiston Respublikasi Prezidenti Administratsiyasi rahbarining o‘rinbosari Hilola Umarova va Oliy taʼlim, fan va innovatsiyalar vaziri Qo‘ng‘irotboy Sharipov kirish so‘zlari bilan ochib berdilar.
Ularning ta’kidlashicha, bugungi globallashuv sharoitida oliy taʼlim tizimi oldida turgan eng muhim va strategik vazifalardan biri – sunʼiy intellekt texnologiyalarini o‘quv jarayoniga joriy etish, ulardan samarali foydalanish hamda milliy modelni shakllantirishdir.
Hilola Umarova Prezidentimiz tashabbuslari bilan oliy taʼlim, ilm-fan va innovatsiyalar sohasida olib borilayotgan islohotlarning yangi bosqichida sunʼiy intellekt alohida ustuvor yo‘nalish sifatida belgilanganini qayd etdi.
– Bugun dunyoning ilg‘or universitetlari taʼlim samaradorligini oshirish, talabalarning o‘quv faoliyatini tahlil qilish, dars jarayonini individuallashtirish, akademik halollikni taʼminlash kabi vazifalarda sunʼiy intellektdan amaliy yordamchi sifatida foydalanmoqda, – dedi H. Umarova.
Shuningdek, u tez surʼatlarda o‘zgarib borayotgan global axborot maydoni sharoitida universitetlar oldida tezkor xulosalar chiqarish va moslashuvchan yondashuvlarni ishlab chiqish zarurligini ta’kidladi.
Vazir Qo‘ng‘irotboy Sharipov fikriga ko‘ra, mazkur yo‘nalishda O‘zbekiston oliy taʼlim tizimi uchun eng ustuvor vazifalardan biri – universitetlarni sunʼiy intellekt sohasida bilim, tajriba va ilmiy izlanishlar markaziga aylantirishdir.
Shu maqsadda oliy taʼlim muassasalarida sunʼiy intellekt bo‘yicha ilmiy laboratoriyalar tashkil etish, ixtisoslashgan markazlar va xalqaro ilmiy hamkorlik yo‘nalishlarini kengaytirish, qo‘shma taʼlim dasturlari va ilmiy grantlar sonini oshirish, yosh olimlar va talabalar uchun mahalliy muammolarga yechim topuvchi intellektual modellar yaratish imkoniyatlarini kengaytirish zarurligi alohida qayd etildi.