Berlinda O‘zbekiston–Germaniya universitetlari rektorlari birinchi forumi doirasida muhim uchrashuvlar o‘tkazildi
2025-11-18 17:00:00 / Vazirlik yangiliklari
Tadbir ikki davlat o‘rtasida ilmiy hamkorlikni chuqurlashtirish, oliy ta’limni modernizatsiya qilish va ilmiy integratsiyani jadallashtirishga qaratildi.
Shu doirada Germaniya Rektorlar Konferensiyasi (HRK) rahbari Doktor Valter Rozental bilan uchrashuvda virtual yoki gibrid platforma yaratish, qo‘shma ta’lim dasturlarini kengaytirish, professor-o‘qituvchilar almashinuvi va ilmiy stajirovkalarni yo‘lga qo‘yish masalalari muhokama qilindi.
Germaniya Akademik almashinuv xizmati (DAAD) direktori Doktor Xeyko Shmidt bilan uchrashuvda stipendiya kvotalarini oshirish, magistratura va doktorantura yo‘nalishlarida imkoniyatlarni kengaytirish, yosh tadqiqotchilar uchun qisqa muddatli ilmiy tashriflar, amaliyotlar va yozgi maktablar tashkil etish masalalari ko‘rib chiqildi. Shuningdek, O‘zbekiston universitetlarida nemis tili o‘qitilishini rivojlantirish va qo‘shma til markazlarini yaratish istiqbollari muhokama qilindi.
Germaniya Tadqiqotlar jamg‘armasi (DFG) vitse-prezidenti, professor Doktor Karin Yakobs bilan uchrashuvda fundamental fanlarni rivojlantirish, qo‘shma ilmiy loyihalar, yosh tadqiqotchilar salohiyatini oshirish, xalqaro standartlarda ilmiy ekspertiza va grantlar boshqaruvini joriy etish masalalari muhokama qilindi. Tomonlar fizika, kimyo, materialshunoslik, biotexnologiya, energetika va axborot texnologiyalari sohalarida qo‘shma loyihalarni rivojlantirish va Max Planck hamda Leibniz jamg‘armalari laboratoriyalari bilan hamkorlik qilishni qo‘llab-quvvatlashdi.
Uchrashuvlarda O‘zbekiston va Germaniya oliy ta’lim hamjamiyatlari o‘rtasida shakllanayotgan strategik hamkorliklar ikki davlatda ilmiy izlanishlar, innovatsion faoliyat va kadrlar tayyorlash sifatini oshirishga xizmat qilishi ta’kidlandi.
Shuningdek, forum doirasida Germaniyada tahsil olayotgan talaba-yoshlar bilan ham uchrashuv o‘tkazilib, talabalarning ta’lim jarayoni va ilmiy faoliyat bo‘yicha taassurotlari tinglandi. Uchrashuvda kelgusida hamkorlikni kengaytirish va talabalar amaliyoti hamda ilmiy loyihalardagi ishtirokini oshirish masalalari muhokama qilindi.
Ma’lumot uchun: Toshkent davlat iqtisodiyot universitetining 17 nafar talabasi Germaniya universitetlarida akademik almashinuv dasturi doirasida tahsil olib, Saksoniya talabalari almashinuv dasturi grantlari orqali universitetga 81 338 yevro miqdorida xorijiy investitsiya jalb etilmoqda.