Олтинсой туманида тадбиркорлик лойиҳалари ижроси ўрганилди
2026-02-08 18:55:00 / Янгиликлар
Бугун вилоят ҳокими Улуғбек Қосимов Олтинсой туманига ташрифи давомида тадбиркорлик лойиҳалари, янги ташаббуслар тақдимотлари ҳамда ишбилармонлик муҳитини яхшилаш мақсадида олиб борилаётган қурилиш ишлари ижроси билан танишди.
Хусусан, Бибизайнаб маҳалласида "Строй маркет сервис" МЧЖ томонидан бўш бино негизида ташкил этилаётган савдо ва маиший хизмат кўрсатиш мажмуаси, шунингдек, Ипоқ маҳалласида асфалт ишлаб чиқариш заводи ҳамда қум ва тош ишлаб чиқариш лойиҳалари кўздан кечирилди.
Вилоят раҳбари лойиҳалар билан бевосита танишиб, тадбиркорларга тегишли тавсиялар берди ҳамда масъулларга бўш биноларда истиқболли лойиҳаларни йўлга қўйиш, тадбиркорларга фаолиятини бошлаш ва кенгайтиришда яқиндан кўмаклашиш бўйича топшириқлар берди.
Шунингдек, Янгиқурилиш маҳалласида жойлашган коллекторни замонавий дренаж усулида ёпиш орқали ҳосил бўладиган бўш майдонда туну-кун фаолият юритувчи туризм кўчасини ташкил этиш лойиҳаси доирасида амалга оширилаётган ишлар билан ҳам танишилди.
Ташриф давомида аҳоли билан самимий суҳбат ўтказилиб, ҳудуд инфратузилмасини яхшилаш, тадбиркорликни ривожлантириш ҳамда аҳоли турмуш даражасини оширишга қаратилган лойиҳалар ҳақида маълумот берилди.
Ташриф якунида тумандаги самарасиз боғлар ўрнида интенсив ва саноатлашган боғлар ташкил этиш вазифаларининг ижроси ҳам кўздан кечирилиб, соҳа ва туман масъулларига тегишли вазифалар белгилаб берилди.