Хизматларда. «Ҳаво дарвозаси» хавфсизлиги ишончли қўлларда
2025-10-30 23:00:00 / Янгиликлар
Кейинги йилларда Фарғона вилоятининг сайёҳлик салоҳияти сезиларли даражада ошди. Биргина 2024 2025 йиллар давомида ўтказилган халқаро ва республика миқёсидаги 65 та фестиваль, форум ва бошқа оммавий тадбирлар давомида вилоятга 3 миллиондан ортиқ маҳаллий, 1 миллионга яқин хорижлик сайёҳлар ташриф буюрди.
Аксарият хорижлик меҳмонлар вилоятга Фарғона халқаро аэропорти орқали кириб келади. «Ҳаво дарвозаси» дея таърифланадиган ушбу аэропортдан бир кунда Россия, Саудия Арабистони, Туркия каби давлатларга ўндан ортиқ рейслар амалга оширилади. Бу аэропорт кунига 1000 нафар-дан 2000 нафаргача йўловчиларга хизмат кўрсатади дегани.
Фарғона вилояти ТХТБ Фарғона аэропортида хавфсизликни таъминлаш бўлинмаси ходимлари жамоат тартибини сақлаш ҳамда йўловчилар хавфсизлигини таъминлаш борасида туну кун ҳушёрликда хизмат олиб бормоқда.
Вилоятимизга кириб келаётган хорижлик меҳмонлар биринчи таассуротни аэропортдан оладилар, — дейди бўлинма бошлиғи, майор Шоҳруҳ Ҳусанбоев. — Шу боис узоқ-яқиндан келувчи турли миллат ва элат вакилларини ўзбекона лутф билан «Хуш келибсиз» дея қарши олишади.
Хушмуомала бўлиб, уларга оқ йўл тилайдилар. Албатта, бунда жамоат тартибини сақлаш, йўловчилар хавфсизлигини таъминлашга биринчи галдаги вазифа сифатида қаралади.
Яқинда Фарғона шаҳри яна бир нуфузли халқаро анжуман «Фарғона водийси: тинчлик ва тараққиёт йўлида саъй-ҳаракатларни бирлаштириш» мавзусидаги тинчлик форумига мезбонлик қилди.
Форумга МДҲ, Марказий Осиё, Европа, Америка қитъаси ва араб мамлакатларидан 200 нафардан зиёд сиёсатчилар, олимлар, экспертлар ташриф буюрди.
Таъкидлаш жоизки, Президентимиз Шавкат Мирзиёев БМТ Бош Ассамблеясининг 80-юбилей сессиясидаги маърузасида Марказий Осиёни тинчлик ва яхши қўшничилик маконига айлантириш бўйича қатор таклиф ҳамда ташаббусларни илгари сурган эди.
Мазкур Тинчлик форуми Юртбошимиз томонидан жаҳоннинг олий минбаридан туриб билдирилган таклифларининг амалдаги ифодаси сифатида, зўр уюшқоқлик билан ўтказилди. Шу боис унга дунё жамоатчилигининг эътибори катта бўлди.
©️ “Postda” газетаси, Абдувосит Сидиқов, Фарғона вилояти.