Жазони ижро этиш департаментида байрамона тадбир ўтказилди
2025-10-29 12:30:00 / Янгиликлар
Жорий йилда ҳам Президентимиз фармонига мувофиқ, бир гуруҳ ички ишлар органлари ходимлари давлат мукофотларига сазовор бўлдилар. Мукофотларни топшириш маросими Ички ишлар вазирлиги Маданият саройида тантанали равишда бўлиб ўтди. Тадбирда Ички ишлар вазири иштирок этиб, мукофотларни ўз эгаларига топширди.
Байрам муносабати билан ИИВ ҳузуридаги Жазони ижро этиш департаментида ҳам катта тантана уюштирилди. Департамент бошлиғи шахсий таркибга Ички ишлар вазирининг байрам табригини ўқиб эшиттирди. Шунингдек, департамент раҳбари ходимларга самимий тилаклар йўллаб, уларга сиҳат-саломатлик, оилавий фаровонлик ва хизматда муваффақиятлар тилади. Шу куни бир гуруҳ фидойи ходимларга Ички ишлар вазирлигининг идоравий кўкрак нишонлари, фахрий ёрлиқлар ва бошқа эсдалик совғалари топширилди.
Байрамона кайфият департамент ҳовлисида ўтказилган концерт дастури ва дастурхон атрофидаги самимий суҳбатлар орқали янада кўтаринкилик касб этди.
Ички ишлар органлари – давлатимизнинг барқарор ривожланишига, фуқароларнинг тинч ва осойишта ҳаёт кечиришига хизмат қиладиган муҳим тизим ҳисобланади. Ҳар бир ходимнинг хизмат бурчи нафақат касбий масъулиятни, балки фидойилик ва ватанпарварликни ҳам талаб этади. Шу сабабли уларнинг меҳнатига бўлган эътибор – бу тинчликни қадрлаш, осойишталикни муҳофаза қилишга бўлган эътибор демакдир.
ИИВ ҳузуридаги Жазони ижро этиш департаменти Ахборот хизмати