Саломатлик посбонлари. Бамисоли нажот фаришталари
2025-10-23 08:30:00 / Янгиликлар
Дунёдаги энг савобли касб эгалари — шифокорлар қўли шифо, сўзи таскин, нигоҳи умид манбаи, нажот фаришталари сифатида эътироф этилади. Ана шундай фидойи инсонлардан бири Навоий вилояти ИИБ Тиббиёт бўлими Поликлиникасининг 1-шохобча оилавий шифокори, терапевт Ёрқиной Ҳамроевадир.
Лавҳамиз қаҳрамони дастлаб Қизилтепа тумани Тиббиёт бирлашмасида, сўнг Навоий шаҳридаги 1-сонли оилавий поликлиникада даволовчи шифокор бўлиб фаолият кўрсатди.
- Беш йилдан буён юрак ишемик ва гипертония касаллигидан азият чекаман, тез чарчаб қоламан, қон босимим кўтарилиб туради. Ёрқиной умридан барака топсин. Вақти-вақти билан ҳолимдан хабар олиб туради. Қон босимимни ўлчаб, мен учун ажратилган дори-дармонларни етказиб беради, — дейди ички ишлар органлари фахрийси истеъфодаги майор Бахтиёр Гадоев.
- Беморларнинг «Сиздан шифо топдим, раҳмат!», -деган икки оғиз сўзидан бутун кўнглимиз тоғдек кўтарилади. Кимгадир нафи текканини ҳис қилиш шифокор учун катта бахт, — дейди Ёрқиной Ҳамроева.
Бундан ташқари, лавҳамиз қаҳрамони шахсий таркиб ўртасида мунтазам равишда саломатлик дарслари, тарғибот-ташвиқот тадбирларини ҳам олиб боришга ўз ҳиссасини қўшиб келмоқда.
Маҳлиё ХОЛОВА, ўз мухбиримиз.
Навоий вилояти.