Қонунчиликдаги янгиликлар. Ўз вақтида рўйхатдан ўтиш шарт
2025-10-12 23:00:00 / Янгиликлар
Жорий йил 10 июлда қабул қилинган «Ўзбекистон Республикаси фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш тўғрисида»ги қонун юртимиз фуқароларини, чет эл фуқароларини ҳамда фуқаролиги бўлмаган шахсларни яшаш жойи ва турган жойи бўйича рўйхатдан ўтказиш билан боғлиқ муносабатларни тартибга солади.
Унга кўра, шахсларнинг яшаши учун уй-жой майдонини берувчи турар жой мулкдори ёки уни тасарруф этиш ҳуқуқига эга шахс ушбу шахсларни яшаш жойи ёки турган жойи бўйича ўз вақтида рўйхатдан ўтказиши керак.
Юқорида санаб ўтилган шахслар янги манзилга келган кунидан 10 иш куни ичида, хорижда доимий яшовчи ҳамюртларимиз ҳам республикамизга кирган кунидан 10 иш куни ичида, бошқа давлатда доимий яшовчи чет эл фуқаролари ва фуқаролиги бўлмаган шахслар эса Ўзбекистон Республикасига кирган кунидан 3 иш куни ичида рўйхатдан ўтишлари шарт.
Ўзбекистон Республикаси фуқароларини яшаш жойи бўйича рўйхатдан ўтказишда эндиликда Давлат хизматлари марказларида, турган жойи бўйича рўйхатдан ўтказишда эса ички ишлар органларининг таянч пунктлари ва маҳалла ҳуқуқ-тартибот масканларида амалга оширилиши кўзда тутилган.
Яна бир янгилик шуки, ўз ота-онасининг ёки ота-онасидан бирининг яшаш жойи манзилида болани яшаш жойи бўйича рўйхатдан ўтказишда мулкдорнинг тураржой майдонини бериш тўғрисидаги розилиги талаб этилмайди.
©️ “Postda” газетаси, Акмал Тўраев, лейтенант.