Қашқадарё вилояти ИИБ бошлиғи раҳбарлигидаги ишчи гуруҳ томонидан Касби туманида профилактик йўналишдаги ўрганиш ишлари олиб борилди
2025-10-06 09:00:00 / Янгиликлар
Ташриф давомида вилоят ИИБ бошлиғи “Қатағон” маҳалла фуқаролар йиғинида бўлиб, маҳалла еттиликлари, тунги хизматга жалб қилинган шахслар билан суҳбат ўтказди.
Унда маҳаллада ҳуқуқбузарликларнинг олдини олиш, жамоат тартибини таъминлаш, фуқароларнинг мурожаатларига ўз вақтида ва холисона эътибор қаратиш масалалари муҳокама қилинди.
Шу билан бирга, маҳалладаги мавжуд муаммоларни маҳалла етакчилари ва профилактика инспекторлари ҳамкорлигида босқичма-босқич ҳал этиш бўйича тегишли топшириқлар берилди.
Шундан сўнг, полковник Абдувохид Исмоилов тумандаги “Дўстлик” маҳалла фуқаролар йиғинида бўлиб, ҳудудда фаолият юритаётган тунги хизмат ходимлари ва маҳалла фаоллари билан суҳбатлашди.
Суҳбат чоғида ҳудуддаги криминоген вазият, жиноятчиликка олиб келувчи сабаблар ва омилларни бартараф этиш, шунингдек, вояга етмаганлар ўртасида ҳуқуқбузарликларнинг олдини олиш масалаларига алоҳида эътибор қаратилди.
Вилоят ИИБ бошлиғи ҳудудда жамоат хавфсизлигини таъминлаш, фуқароларнинг осойишталигини сақлаш ҳамда ҳар бир маҳаллада “Хавфсиз ҳудуд” тамойилларини тўлиқ жорий этиш бўйича масъулларга аниқ топшириқлар берди.
Ташриф доирасида маҳалла профилактика инспектори томонидан жиноятчиликни барвақт аниқлаш ва унинг олдини олишга қаратилган чора-тадбирлар бўйича тайёрланган тақдимот тингланди.
Тақдимот жараёнида амалга оширилаётган ишлар таҳлил қилиниб, мавжуд камчиликларни бартараф этиш ва профилактика ишларини янги босқичга олиб чиқиш зарурлиги қайд этилди.
Якунда, полковник Абдувохид Исмоилов маҳалла ҳудудида ҳуқуқбузарликларнинг олдини олиш, жамоат тартибини мустаҳкамлаш, ёшларни соғлом муҳитда тарбиялаш ва аҳолининг ҳуқуқий маданиятини ошириш борасидаги ишларни кучайтириш юзасидан мутасаддиларга аниқ вазифаларни белгилаб берди.
Қашқадарё вилояти ИИБ Ахборот хизмати