Нукусда “Долзарб 20-кун” доирасида жамоат хавфсизлиги кучайтирилмоқда
2025-10-04 18:40:00 / Янгиликлар
“Долзарб 20-кун” оператив-профилактик тадбирлари доирасида Нукус шаҳрида Қорақалпоғистон Республикаси Ички ишлар вазири ҳамда Республика прокурори иштирокида ички ишлар органлари, Миллий гвардия ва Фавқулодда вазиятлар бошқармаси ходимлари учун хизмат олди йиғини ташкил этилди.
Йиғинда жамоат тартибини таъминлаш, ҳуқуқбузарликларни олдини олиш ва аҳолининг хавфсизлигини ошириш борасидаги вазифалар муҳокама қилинди. Шу билан бирга, тегишли идоралар ўртасидаги ҳамкорликни кучайтириш масалаларига алоҳида эътибор қаратилди.
Тадбир доирасида вазир ва прокурор Нукус шаҳридаги “Халқлар дўстлиги” маҳалла фуқаролар йиғини ҳудудига ташриф буюриб, бу ерда амалга оширилган ишлар – хавфсиз йўлаклар ташкил қилиниши ва бошқа ижобий ташаббуслар билан танишди. Маҳалланинг “қизил” тоифадан “сариқ” ва “яшил” тоифага ўтказилиши юзасидан масъулларга аниқ вазифалар юклатилди.
Ташриф давомида маҳалладаги ҳуқуқбузарлик ҳолатлари, уларнинг сабаблари ва профилактик чора-тадбирларнинг самарадорлиги ўрганилди. Аҳоли ва маҳалла фаоллари билан учрашув ўтказилиб, фуқароларнинг ҳуқуқий онгини ошириш ва жамоат тартибини сақлашдаги иштироки муҳокама қилинди.
Бу каби ташрифлар жиноятчиликни камайтириш, аҳоли хавфсизлигини таъминлаш ҳамда маҳаллаларда барқарор ҳуқуқий муҳитни шакллантиришга хизмат қилади.
Қорақалпоғистон Республикаси ИИВ Ахборот хизмати