ИИВ раҳбарияти томонидан ҳудудларда ўтказилаётган кенг кўламли профилактик тадбир доирасида Қашқадарё вилоятида жиноятчиликка қарши курашиш ва хавфсизликни таъминлаш масалалари кўриб чиқилди
2025-09-30 15:00:00 / Янгиликлар
Ички ишлар вазири ўринбосари генерал майор Баходир Юлдашевич Мирзарахимов ҳузурида Республика миқёсида ўтказилаётган «Хавфсиз ҳудуд долзарб 20 кунлик» тезкор махсус профилактик тадбири давомида амалга оширилиши лозим бўлган ишлар муҳокама қилинди.
Йиғилишда бошқарма бошлиғи, ўринбосарлари, соҳавий хизматлар раҳбарлари, ҳудудий ички ишлар органлар раҳбарияти ҳамда шахсий таркиб иштирок этди.
Танқидий таҳлилий-тарзда ўтган муҳокамада дастлаб, жорий йилнинг ўтган даври мобайнида вилоят ҳудудида жиноятчиликка қарши курашиш, ҳуқуқбузарликларни олдини олиш борасида амалга оширилган ишлар муҳокама қилинди.
Жараёнда 2025 йил якунига қадар Қашқадарё вилоятида жиноятчиликнинг барвақт олдини олишга доир маҳалла, туман-шаҳар, хизмат соҳа ҳамда вилоят кесимида ишлаб чиқилган йўл хариталари, шунингдек, янги лойиҳалар, куч воситалар ва моддий-техника таъминотини яхшилаш бўйича қилинган таклифлар муҳокама қилинди.
Ички ишлар вазири ўринбосари билдирилган таклиф ҳамда мулоҳазаларга нисбатан ўзининг тавсияларини бериб, йўл қўйилган камчиликлардан зарурий хулоса чиқариб, берилган вазифа ва топшириқларни виждонан бажариш, фуқаролар хавфсизлиги ҳамда ҳуқуқбузарлик ва жиноятларни барвақт олдини олиш бўйича топшириқлар берди.
Йиғилиш якунида кўтарилган ҳар-бир масала юзасидан тегишли соҳавий хизматлар масъуллари, ҳудудий ички ишлар органлари раҳбарларига аниқ топшириқлар берилиб, ҳар бир топшириқни бажариб ахборот бериш, бунда раҳбарлар қўл остидаги шахсий таркибнинг кундалик вазифаларини тўғри тақсимлаган ҳолда назорат қилишлари юзасидан кўрсатмалар берилди.