Тошкент давлат иқтисодиёт университетида Тошкент шаҳар Ички ишлар бош бошқармаси билан ҳамкорликда «Раҳбар ва ёшлар учрашуви» ташкил этилди. Тадбирда муҳим стратегик Меморандум имзоланди
2025-09-28 12:15:00 / Янгиликлар
Тошкент давлат иқтисодиёт университетида Тошкент шаҳар Ички ишлар бош бошқармаси билан ҳамкорликда «Раҳбар ва ёшлар учрашуви» ташкил этилди.
Мулоқотда университет ректори Т.З. Тешабаев, Тошкент шаҳар Ички ишлар бош бошқармаси бошлиғи ўринбосари подполковник И.Р. Тиллаев, соҳа ходимлари, профессор-ўқитувчилар, талаба-ёшлар ҳамда оммавий ахборот воситалари вакиллари иштирок этдилар.
Тадбир давомида мамлакатимизда рақамли технологиялар ва киберхавфсизлик йўналишида таълим, илм-фан ва амалиёт ўртасидаги ҳамкорликни мустаҳкамлаш, кадрлар тайёрлаш сифатини ошириш ҳамда бу соҳада замонавий илғор тажрибаларни жорий этиш масалаларига алоҳида эътибор қаратилди.
Шунингдек, тадбир доирасида жамиятда кибержиноятчилик муаммосига бағишланган маъруза ҳам ўтказилди.
Унда кибермаконда содир этилаётган жиноятларнинг турлари, уларнинг аҳоли ҳаёти ва давлат хавфсизлигига салбий таъсири, ахборот ресурслари ва шахсий маълумотларни муҳофаза қилишнинг долзарб жиҳатлари атрофлича ёритилди.
Маърузачилар замонавий технологиялар орқали юзага келаётган таҳдидлар, кибербуллинг, рақамли фирибгарлик ва маълумотлардан ноқонуний фойдаланиш ҳолатларига эътибор қаратдилар.
Шу билан бирга, улар бундай жиноятларнинг олдини олишда профилактик чоралар, аҳоли, айниқса, ёшларнинг киберхавфсизлик маданиятини ошириш ҳамда бу йўналишда давлат органлари, олий таълим муассасалари ва жамиятнинг ўзаро ҳамкорлиги ҳал қилувчи аҳамият касб этишини алоҳида таъкидладилар.
Учрашув доирасида университет ва Бош бошқарма ўртасида рақамли технологиялар ва киберхавфсизлик йўналишида ҳамкорлик қилиш ҳамда тажриба алмашиш бўйича стратегик Меморандум имзоланди.
Имзоланган ушбу стратегик ҳужжат икки йирик муассасанинг — Тошкент шаҳар Ички ишлар бош бошқармаси ва Тошкент давлат иқтисодиёт университетининг ўзаро ҳамкорликдаги янги босқичини бошлаб берди.
Меморандумнинг асосий мақсади рақамли технологиялар ва киберхавфсизлик соҳасида таълим, илм-фан ва амалиётни бирлаштириш, юқори малакали кадрлар тайёрлаш сифатини янада ошириш, соҳада юзага келаётган таҳдидларга замонавий ва самарали ечимларни ишлаб чиқишдан иборатдир.
Шу билан бирга, кибержиноятларга қарши самарали курашиш, сунъий интеллект технологияларини амалиётга жорий этиш ва рақамли изларни таҳлил қилиш каби устувор йўналишларда ҳамкорлик алоқаларини мустаҳкамлаш мамлакатимизда хавфсиз ва барқарор рақамли муҳитни шакллантиришда муҳим қадам бўлиб хизмат қилиши алоҳида қайд этиб ўтилди.
Тошкент давлат иқтисодиёт университетида ёшлар ўртасида жиноятчиликни олдини олиш қаратилган самарали ишлар олиб борилмоқда.
Университетда ташкил этилган «Раҳбар ва ёшлар учрашуви» ва унда имзоланган стратегик ҳамкорлик меморандуми — амалий саъй-ҳаракатларнинг ёрқин ифодаси десак бўлади.