Қарши шаҳри ва туманида жамоат хавфсизлигини таъминлаш бўйича кенг қамровли ўрганишлар ўтказилди
2025-09-26 12:30:00 / Янгиликлар
Мамлакатимиз бўйлаб изчил равишда амалга оширилаётган «Хавфсиз ҳудуд» махсус профилактик тадбири доирасида Қашқадарё вилояти ИИБ бошлиғи раҳбарлигидаги ишчи гуруҳ Қарши шаҳри ва туманида аҳоли осойишталигини таъминлаш, ҳуқуқбузарликларнинг олдини олиш ва жамоат тартибини мустаҳкамлаш бўйича ўрганишлар ўтказди.
Ўрганишлар давомида «Мевазор», «Алишер Навоий», «Барош», «Шодлик» ҳамда «Мустақиллик» маҳаллаларида тунги хизматга жалб қилинган ходимлар, маҳалла профилактика инспекторлари, қўриқлаш бўлими ва вилоят ИИБ ЖХХ ЖТСБ ППХ батальони фаолияти кўздан кечирилди. Жараёнда кўп қаватли уйларнинг кириш-чиқиш жойларига домофонлар ўрнатилгани, маҳалла ва кўчаларда кузатув камералари жойлаштирилгани, айрим объектларни қўриқлаш пультига улаш ишлари йўлга қўйилгани қайд этилди. Шунингдек, савдо ва хизмат кўрсатиш шохобчаларида хавфсизликни кучайтириш, кузатув тизимини кенгайтириш, аҳоли учун қулай ва хавфсиз муҳит яратиш бўйича тегишли кўрсатмалар берилди.
Тадбир доирасида ҳуқуқбузарликларнинг барвақт олдини олиш, ёшларни соғлом муҳитда тарбиялаш, жиноятчиликка қарши курашишда маҳалла фаоллари ва ёшларни янада кенг жалб қилиш масалалари муҳокама қилинди. Шу билан бирга, қўриқлаш ходимларининг фаоллиги ва тезкорлиги текширилди ҳамда масъулларга аниқ вазифалар юклатилди.
Қашқадарё вилояти ИИБ Ахборот хизмати