ИИВ Қоровул қўшинларига қарашли ҳарбий қисмларга бириктирилган мактабларда тадбирлар кўтаринки руҳда бўлиб ўтди
2025-09-03 09:00:00 / Янгиликлар
Биринчи қўнғироқ ва билимлар куни муносабати билан мамлакатимиз бўйлаб ўтказилган тадбирларда ИИВ Қоровул қўшинлари ҳарбий қисм ва бўлинмаларига бириктирилган жами 10 та «Жасорат» мактабларининг очилиши маросими ҳарбий қисм шахсий таркиби ҳамда кенг жамоатчилик вакиллари иштирокида кўтаринки руҳда бўлиб ўтди.
ИИВ Қоровул қўшинларига бириктирилган ушбу мактабларда ўқувчи ёшларни ҳар томонлама билим олишлари, интеллектуал салоҳиятини ошириб бориши, жисмоний тарбия билан шуғулланишлари учун турли хил спорт тўгараклари ва барча шарт-шароитлар яратилиб берилган бўлиб, ўқувчилар билан тизимли равишда белгиланган вақтларда амалий-кўргазмали машғулотлар ҳам ташкил этилиши борилиши режалаштирилган.
Ҳудудларда ўтказилган билимлар куни тадбирларида Қоровул қўшинлари қўмондонлиги, ҳарбий қисмлар раҳбарияти ва масъуллари пойтахтимиздаги 138-сонли, Навоий ва Тошкент вилоятларидаги 7, 34, 41, ва 35, 39-сонли, Бухоро, Қашқадарё, Наманган ва Андижон вилоятларидаги 5, 33, 71 ва 1-сонли умумий ўрта таълим мактабларида бўлиб, унда илк бора билим даргоҳига қадам қўйган жажжи болажонлар ҳамда барча ўқувчиларини Давлатимиз мустақиллигининг 34 йиллик байрами ва янги ўқув йили билан муборакбод этишди.
Айтиш жоиз, келгусида мазкур мактабларда ўқувчиларни ватанпарвар, юртига содиқ, мард ва жасур йигит қизлар бўлиб етишиши борасидаги амалий ишлар тизимли равишда давом эттирилиб борилади ва қўмондонликнинг доимий диққат эътиборида бўлади.
ИИВ Қоровул қўшинлари қўмондонлиги Ахборот гуруҳи